Dili, Timor-Leste – Adjunta Prokuradór Jerál Repúblika, Dra. Zélia Trindade, hatete katak lei kontra korrupsaun iha Timor-Leste adekuadu ona no buat ida ne’ebé presiza atu hadi’ak tan mak implementasaun hosi lei hirak ne’e hodi hamosu luta kontra korrupsaun ida ne’ebé efikás.

Adjunta PJR hato’o liafuan ne’e durante semináriu ida ho marka Selebrasaun Loron Mundiál Kontra Korrupsaun nian ne’ebé GOPAC (Global Organization of Parliamentarians Against Corruption) Timor-Leste organiza iha Salaun Konferénsia Novo Turismo iha Lecidere, Dili iha Sábadu (9/12/2017) foin lailais ne’e.

“Mezmu ita iha lei ne’ebé adekuadu maibé ita seidauk iha implementasaun ne’ebé adekuadu, entaun iha ema seluk bele aproveita situasaun vunerável ida-ne’e hodi halo atuasaun ne’ebé ladi’ak hodi hamosu korrupsaun,” Adjunta PJR dehan.

Sai nu’udar oradór ida iha semináriu ho tema tema A Luta Contra Corrupção é Um Dever Patríotico de Todos os Patriotas Timorenses, Adjunta PJR haktuir katak luta kontra korrupsaun ohin-loron sai ona devér síviku no patriótiku hosi sidadaun hotu hodi harii sosiedade Timor-leste ida bazeia ba justisa sosiál, bem-estar, no igualdade.

Adjunta PJR mós hatutan katak korrupsaun sai hanesan ameasa boot ida ba demokrasia no dezenvolvimentu sósiu-ekonómiku, establidade social, igualdade no oportunidade ba sidadaun sira.

Adjunta PJR haree katak korrupsaun sai ona fenómena ida ne’ebé aprezenta dezafiu oioin ba ema barak nia moris di’ak iha Timor-Leste no tan ne’e konvida ema hotu hodi luta kontra korrupsaun.

Oradór sira seluk ne’ebé hato’o sira-nia aprezentasaun iha semináriu ne’e mak Vise Ministru Justisa Sebastião Dias Ximenes no Komisáriu Komissaun Anti Korrupsaun Adérito Tilman.

Semináriu loron ida ho marka selebrasaun Loron Mundiál Kontra Korrupsaun 2017 ne’e GOPAC mak organiza.

Iha ninian abertura semináriu nian, Prezidente Ezekutivu GOPAC Timor-Leste, deputadu Francisco Miranda Branco,  haktuir katak korrupsaun ne’e hanesan virus ida ne’ebé halakon ema nia integridade no tan ne’e ita tenke kombate virus ne’e, hanesan ita kombate virus HIV/SIDA.

Deputadu ne’e haktuir tan katak luta kontra korrupsaun seidauk efikás iha Timor-Leste tanba país ne’e seidauk aprova lei kontra korrupsaun, hodi sujere atu lei kontra korrupsaun tenke prevee artigu ida kona-ba enrikesimentu ilísitu hodi halo lei ne’e forte liu tan.

“Karik ita prova lei Anti Korrupsaun maibé laiha artigu ida mós ko’alia kona-ba enrikesimentu ilísitu entaun ita halo lei ida klamar laiha,” Prezidente Ezekutivu GOPAC ne’e dehan.

Entidade sira ne’ebé mak partisipa mós iha dikusaun ne’e mak Embaixadór Uniaun Europeia ba Timor-Leste, Inspetór Jerál Estadu Francisco de Carvalho, reprezentante denominasaun relijioza oioin hanesan Pe. Aniceto Maia, O.Carm, Me. Guilhermina Marçal, Rev. Daniel Marçal, no líder komunidade musulmanu Timor-Leste, inklui komunidade akadémika hosi unuiversidade oioin iha Dili, reprezentante sosiedade sivil, no media nasionál sira. (Média PJR/Maria Lin)