DíLI – Prokuradór-Jerál Repúblika, (PJR) Dr. José da Costa Ximenes halo abertura ba semináriu ho tema prinsipál “Formasaun Kontínua no Treinamentu ba Advogadu Privadu no Jurista timoroan sira, iha Timor Plaza, Sexta (10/08/18)
Iha serémonia abertura ne’e, PJR informa katak, “kapasitasaun no formasaun kontínua la’ós de’it imperativu ida husi kualifikasaun profisionál maibé mós hanesan devér deontolójiku ida husi valór sira ne’e ezije koñesementu no mós abilidade profisionál no rigór iha análize, ne’e duni tenki mantein no haforsa liuhusi asaun formasaun”, dehan PJR liuhusi nia abertura.
Iha okaziaun ne’e mós PJR informa katak, ho formasaun sira ne’e atubele, hakbi’it no aumenta maluk advogadu sira nia koñesementu “Formasaun kontínua ne’e, hanesan kestaun importante ida atu hasa’e advogadu no jurista sira-nia kapasidade, tanba ezijénsia lorloron aumenta, hein katak ba futuru, advogadu sira bele halo diskusaun nafatin, hodi diskuti kona-ba temátika oioin ne’ebé bele kontribui ba administrasaun justisa iha ita-nia rain”.
PJR tenik tan “ita hotu konkorda nu’udar fundamentál, iha ninia formasaun, realizasaun no aplikasaun, direitu Timor nian tenke korresponde ho realidade normativa ne’ebé iha vinkulasaun ho valór no ezijénsia espesífika ba ita-nia realidade sosiál no kulturál rasik”.
Nia akresenta tan “méritu husi semináriu ida sai boot, bainhira preokupasaun mós boot atu aborda problema jurídiku sira hahú husi vizaun komprometida ho ita-nia realidade sosiál no kulturál, konkretru ho nia perspetiva no preokupasaun ida-ne’e haree momoos iha tema sira ne’ebé integra iha konteúdu semináriu ida-ne’e”, tenik PJR.
PJR subliña tan katak, semináriu ida-ne’e atu dezenvolve direitu Timor nian, “Programa semináriu ida-ne’e propoin debate diversifikadu ida kona-ba devér atu dezenvolve direitu Timor nian iha nia dimensaun legál, jurisdisionál no doutrinál liuliu sai nu’udar tarefa ida ba jurista timoroan nian” dehan PJR.
Molok PJR termina nia diskursu ba semináriu refere, PJR mós hato’o agradesimentu ba Institutu Jurídiku Timor-Leste (IJTL), ne’ebé konvida ona hodi halo abertura, ho disponiblidade ida-ne’e hodi aprofunda lasu kooperasaun entre institusionál ho institutu IJTL, fiar katak ho sinseridade semináriu ida-ne’e bele kuda fini di’ak no fini ne’e sei fó fuan di’ak iha futuru. (Media PJR)