DILI – Adjunta Prokuradór-Jerál Repúblika (APJR), Zélia Trindade, fahe ninia koñesimentu ba kuadru dirijente tékniku judisiáriu sira durante asaun formasaun ida ne’ebé promove hosi Projetu Apoiu Konsolidasaun Estadu-de-Direitu (akrónimu hosi Portugés, PACED) iha Sentru Formasaun Jurídika no Judisiária, Kaikoli, kuarta-feira (20/09/2017).
SONY DSC
Objetivu husi formasaun ne’e, ne’ebé mak atu aprofunda partisipante sira nia koñesimentu kona-ba lejislasaun nasionál no internasionál relativamente ho korrupsaun, brankeamentu kapitál, inklui mós tráfiku estupefasiente/ droga. Konteúdu hosi formasaun inklui panorama atuál kona-ba matéria ida-idak relativamente ho krime komplexu sira, nomós iha sesaun vídeo hodi analiza ba kazu prátiku.
“Ita hatene katak krime sira ne’e ho natureza extremamente komplexu, nune’e autór judisiariu ho instituisaun relevante sira presiza duni hetan kapasitasaun no sensibilizasaun nafatin kona-ba ita nia lejislasaun relativamente ho matéria hirak ne’e”, dehan APJR.
Zélia Trindade mós informa katak inisiativa ne’e hanesan kontinuasaun programa PACED ne’e tanba, iha tinan-2016, nia partisipa iha formasaun ba formadór sira iha Sentru Estudu Judisiáriu Portugál nian durante fulan ida mak agora implementa fali formasaun iha CFJ Timor-Leste ne’e.
Partisipante iha formasaun refere hamutuk iha ema na’in-20 inklui Juiz, Prokuradór, ho membru sira Polísia Sientífika Investigasaun Kriminál (PSIK) no Unidade Informasaun Finanseira (UIF).
Projetu PACED ne’e hetan apoiu finanseiru hosi Fundu Europeu Dezenvolvimentu Uniaun Europeia no Instituto Público Camões, Portugal, ne’ebé mós sai hanesan responsável ba implementasaun, ho nia objetivu mak promove no suporta polítika boa governasaun sira iha país sira membru PALOP sira nia, mak hanesan Angola, Kabu Verde, Guiné-Bissau, Mosambike, Saun Tomé i Prínsipe no Timor-Leste, liuliu iha matéria prevensaun no kombate hasoru krime brankeamentu kapitál no kriminalidade adjasente, inklui korrupsaun no tráfiku droga. (Media PJR/ Luis Soares)