Díli – Espoza hosi Eis Prezidente Repúblika Taur Matan Ruak (TMR), Dona Isabel Ferreira, hasoru malu ho Prokuradór Jerál Repúblika (PJR), José da Costa Ximenes iha Kolmera, Díli iha Segunda (23/10/2017) hodi ko’alia kona-ba situasaun oioin ne’ebé prizoneiru sira iha Bekora enfrenta
Depois enkontru ho PJR, iha dadalia ho Média PJR, Isabel Ferreira haktuir katak durante enkontru ne’e nia levanta kestaun no preokupasaun oioin ne’ebé prizoneiru sira hato’o ba nia bainhira nia halo vizita ba sira.
“Iha programa ne’ebé ha’u halo iha área justisa, ha’u hala’o vizita ida ba prizoneiru sira no iha-ne’ebá prizoneiru levanta kestaun no preukupasaun oioin kona-ba sira-nia situasaun iha prizaun katak barak mak falta informasaun, falta kona-ba lei sira no sira hanoin katak sira la-iha justiza ida justu tanba kleur iha prizaun,” dehan Isabel Ferreira.
Eis primeira dama ne’e mós haktuir katak nia preokupa ho populasaun hosi Prizaun Bekora ne’ebé atinji ona 500 prizoneiru, no sujere atu parte sira interesadu halo sosializasaun kona-ba lei atu ema barak mak bele komprende no kumpri lei.
“Ita tenke rekoñese katak Prizaun Bekora númeru prizoneiru ne’e barak tebtebes, iha 500 ona, tanba ne’e presiza buka oinsá atu halo sosializasaun di’ak liután kona-ba lei sira ba sidadaun sira atu sira hodi bele koñese lei ho di’ak,” dehan Isabel.
Isabel Ferreira husu atu parte Tribunál, Defensoria Públika no Ministériu Públiku serbisu hamutuk hodi nune’e bele lida didi’ak ho kestaun no preokupasaun hosi prizoneiru sira.
Foin lalais ne’e, Prokuradoria Distritál Díli serbisu hamutuk ho PNTL Munisípiu Díli halo sosializasaun kona-ba lei arte marsiál no arte ritual no armas brancas rama ambon iha Suku Bebonuk, Díli.
Resentamente, kazu krime balu ne’ebé envolve arma branka hanesan rama ambon sai preokupasaun públika iha sidade kapitál Díli no munisípiu seluk tan. Traballadór Xineza ida ema deskoñesidu ida tiru ho rama ambon iha área Vemase foin lailais ne’e. (Média PJR/Luis Soares)