Dili – Eis Adjunta Prokuradór-Jerál Repúblika (APJR), Dra. Zélia Trindade hato’o nia gratidaun agradesimentu ba Prezidente Repúblika (PR), Francisco Guterres Lu-Olo relasiona ho nia mandatu nu’udar APJR ne’ebé termina ona iha loron-28. Fulan-setembru, tinan-2018.

“Ohin oportunidade di’ak mai ha’u atu akompaña Prokuradór-Jerál Repúblika, Dr. José da Costa Ximenes mai hasoru PR, oportunidade ida-ne’e aproveita atu kumprementa ikus nian ba PR, iha biban ne’e hato’o ha’u-nia sentidu gratidaun de-agradesementu ba PR kona-ba konfiansa no responsablidade ne’ebé mak fó mai ha’u iha komisaun servisu nu’udar Adjunta PJR durante periúdu rua’’. Eis APJR kasu lia hirak ne’e ba jornalista sira hafoin ramata reuniaun ho Prezidente Rapúblika iha Palásiu Prezidente Bairru-Pite Dili, Sesta (05/10/2018).

Dra. Zélia Trindade Asumi pasta nu’udar Adjunta-PJR durante periúdu rua, hahú hosi, primeiru periúdu iha loron-03, fulan-Setembru, tinan-2012, no kontinua hetan fiar nafatin ba mandatu daruak hosi, loron-28, fulan-Setembu, tinan-2015.

Nia akresenta tan katak “ba servisu ida-ne’e, ha’u hanesan timoroan ida, ha’u onra no louva, tanba fó ona kontribuisaun ba ha’u-nia rai, enjerálmente ba iha setór justisa, partikularmente ba iha MP, tanba ida ne’e mak, aproveita mós oportunidade, hakarak hato’o mós hau nia gratidaun ba iha PJR Dr. José da Costa Ximenes, pesoa ne’ebé durante ne’e hau servisu ho nia integridade, ho nia konsiderasuan, nia bom sensu, hodi nune’e ami servisu hamutuk hodi lori servisu Ministériu Públiku (MP) nian hakat ba oin ho susesu ne’ebé signifikativu tebes’’ tenik Dra. Zélia.

Liafuan agradese, Dra. Zélia Trindade la haluha hato’o mós ba familia boot MP nian, “Ba susesu hirak ne’e, ha’u mós hakarak hato’o ha’u-nia agradesimentu boot ba ha’u-nia família, kolega majistradu MP nian no mós ba Fusionáriu no ofisiál justisa sira, tanba sira-nia apoiu no kolaborasaun di’ak hodi sai determinasaun ba ha’u-nia susesu nu’udar Adjunta PJR nian durante periúdu rua, tanba sein sira-nia apoiu ha’u mesak labele servisu no ha’u mós la hetan susesu’’. Dehan nia.

Eis Adjutan PJR ne’e promote sei servisu hamutuk nafatin ho Adjuntu foun ne’ebé sei troka nia fatin, “ha’u husu ba kolega ne’ebé sei mai subtitui ha’u-nia fatin nu’udar Adjuntu PJR ha’u-nia dezeju maiór mak susesu servisu MP nian, no ha’u prontu atu fó apoiu no kontribuisaun ba Adjuntu ne’ebé mak atu mai.

Iha biban ne’e mós Dra. Zélia Trindade promete katak, sei fó nafatin nia kontribuisaun ba iha MP, “ikusliu ha’u mós hakarak hatete katak, ha’u mai iha ne’e la’ós atu halo despedida maibé ha’u kontinua fó ha’u-nia tempu no kontribuisaun afavór ba iha servisu MP nian, ha’u hatene katak MP mak ha’u ónra no ha’u-nia prazer tanba ha’u servisu no ha’u reprezenta ba’’. (Media MP).