Colmera Embaixadora Estadus Unidus Amérika (EUA) iha Timor-Leste Kathleen M. Fitzpatrick hala’o audénsia ho Prokuradór-Jerál Repúblika Dr. José da Costa Ximenes, audénsia ne’e hala’o iha Gabinete Prokuradória-Jerál Repúblika, iha loron- Sesta (26/10/18) foin lalais ne’e.

Embaixadora Estadus Unidus Amérika iha Timor-Leste Kathleen M. Fitzpatrick sei ramata nia mandatu, no iha Embaixador foun maka sei mai iha fulan-Dezembru, tinan ida-ne’e no daudaun ne’e nia asistente mak sei subtitui nia servisu iha Timor-Leste. Hateten Embaixadora EUA.

Prokuradór-Jerál Repúblika Dr. José da Costa Ximenes hato’o katak Prokuradória Jerál Repúblika estabelese tan gabinete Sentrál Kombate Korrupsaun, no Kriminalidade Organizadu, gabinete ne’e iha prokuradór nain 5, maibé durante ne’e prokuradór ida hala’o nia knaar hanesan komisáriu Anti Korrupsaun, sira-nia kompetensia hodi halo investigasaun ba krime korrupsaun no krime organizadu, servisu investigasaun hirak ne’e koopera mós ho polísia sientífika investigasaun kriminal (PSIK), no iha mós departamentu ida hanesan; servisu kontensiozu estadu ne’ebé iha prokuradór nain rua, sira mós halo investigasaun aléinde ne’e sira mós halo notifikasaun ba vítima.

Husi servisu rua ne’ebé mak estabelese ona iha Prokuradória Jerál Repúblika, iha mós departamentu menór no família, departamentu ne’e hanaran menór no familia tanba iha ne’e kazu sivil hanesan inan-aman ne’ebé mate ona, departementu menór no família mak sei reprezenta oan sira wainhira foti inan-aman sira nia konta iha banku, departamentu refere mós funsiona iha Prokuradória Distrital haat hanesan; Dili, Baukau, Suai, no Oe-cusse, Aprezenta PJR.

Aléinde ne’e PJR esplika mós servisu Administrasaun jerál iha Ministériu Públiku ne’ebé fó apoiu ba ofisial justisa no prokuradór sira, total funsionáriu MP nian hamutuk 77, Prokuradór 31, ofisial justisa hamutuk 96, inklui sira ne’ebé iha Distritu, nune’e hein katak bele kontinua fortifika servisu hamutuk ho Embaixadora foun ne’ebé atu mai iha fulan-Dezembru tinan ida-ne’e, no fiar katak apoiu kooperasaun entre MP ho Embaixada EUA nian bele sai di’ak liután liuliu iha área formasaun hanesan; kombate korrupsaun, formasaun komplementar, direitu administrasaun, atu nune’e setór judisiál Timor-Leste bele sai di’ak liután.

Embaixadora Estadus Unidus Amérika iha Timor-Leste Kathleen M. Fitzpatrick hato’o katak Embaixador foun ne’e nia mandatu sei to’o tinan rua oin mai, nune’e durante iha nia mandatu programa UNDC bele sai di’ak liután, bele servisu hamutuk, fó formasaun, liuliu ba iha dezenvolvimentu Demokratiku Timor-Leste. (Media/PJR)