Díli, Timor-Leste – Depoizde halo sorumutuk durante loron tolu, enkontru jerál dala 15 hosi Prokuradór Jerál Repúblika CPLP nian, inklui Rejiaun Administrativa Espesiál Makau, sei hotu Sesta (27/10) ohin.
Tuir ajenda, Prokuradór sira iha dadeer sei ba vizita instalasaun Prokuradoria Jerál Repúblika Timor-Leste nian iha Kolmera ne’ebé sei hala’o iha tuku sia dadeer.
Depois vizita ba instalasaun ne’e, PRJ sira ho sira-nia komitiva sei ba halo atividade sosiál iha Likisá to’o meiudia.
Iha fali lorokraik, PJR sira sei halo fali enkontru iha tuku rua ho balu (14:30) hodi halo diskusaun, aprovasaun no asinatura ba Deklarasaun Díli nian. Tuir informasaun, Deklarasaun ne’e sei fó énfaze ba autonomia ministériu públiku iha komunidade CPLP, kooperasaun judisiária atu hametin efikasia jurisdisaun penál, no institusionalizasaun enkontru PJR CPLP nian.
PJR sira mós sei asina memorandu lubuk ida ne’ebé ninian mekanizmu sira elabora ona durante enkontru ne’e.
Tuir ajenda, diskursu ofisiál enserramentu nian sei halo hosi Ministra Justisa Timor-Leste, Dra. Maria Ángela Carrascalão iha tuku haat lorokraik.
Enkontru Jerál PJR CPLP ne’e sei taka ho jantar despedida ne’ebé sei hala’o iha tuku ualu kalan iha Hotel Timor.
Enkontru Jerál PJR CPLP ne’e eventu anuál ida ne’ebé envolve PJR hosi país sira ho língua ofisiál Portugés (CPLP). Ba enkontru jerál tinan ne’e, Prokuradór Jerál hosi Brazíl no Giné Ekitoriál mak la marka prezensa. Prokuradór hosi Rejiaun Administrativa Espesiál Makau (RAEM) hetan pozisaun nu’udar observadór permanente. (Média PJR)