MANUFAHI Tribunál Distrital Suai hala’o julgamentu movel iha  Munisípiu Manufahi, iha kuartel PNTL Munisípiu Manufahi Tersa 27/03/2018, hala’o julgamentu ba krime roubo ne’ebé previstu iha artigu 253 kodigu penal, númeru Nuc: 0126/17.PDSUA.

Iha julgamentu ne’e lezadu ho inisial PCA hato’o ba tribunál katak asosiasaun Pengusaha Persaudaraan Indonesia dan Timor Leste (APPINDOTIM) haruka ami atu buka ema ba kredit kareta no sasan seluk husi Indonesia mai Timor, hau lori ema ne’ebé hatama osan mai hau osan ne’e ho montante rihun lima ($5.000), maske sasan sira ne’e la mai maibé hau selu sira nia osan.

Tuir akuzasaun husi Ministériu Públiku lezadu hanesan Prezidente Asosisiasaun APPINDOTIM, ne’ebé bele fó kreditu kareta bus ho motor no sasan sira seluk, iha momentu ne’e arguidu sira lori osan ba iha Dili atu hatama ba Asosiasaun ne’e, arguidu telefone ba lezadu dehan nia iha hela Aileu nune’e lezadu kontaktu staff sira iha Dili ho inisiál FC hodi simu osan ho montante rihun rua atus hitu lima nulu ($2.750) no lezadu ba asina deit fatura.

Nune’e arguidu sira reklama ba lezadu katak sasan to’o-mai ona maibé realidade laiha, tamba ne’e arguidu prende tiha lezadu nia kareta bus ida, arguidu atu garante lezadu fo fila arguidu nia osan.

Arguidu haktuir katak “momentu ba foti kareta ne’e, kontaktu mós ba lezadu maibé lezadu la atende telefone, arguidu husu xave no dukumentus kareta nian ba kondutor ho inisiál STS”, no arguidu fó osan atus rua ($200) ba kondutor nia kolen, “fó osan la’os hodi nia fó xave maibé selu nia tanba durante ne’e nia halao ona ninia servisu hanesan motorista”.

Hafoin julgamentu juiz mós rona sasin hosi lezadu ho naran inisiál STS, deklara ba tribunál katak momentu ne’ebá nia ba fase kareta bainhira nia fila mai uma, arguidu sira iha uma ona, nia haree arguidu lori ho ema nain neen, nia hatene lezadu mak deve arguidu sira nia osan, “maibé sasin dehan ba arguidu katak kareta nia labele fó tanba kareta hau tenke intrega ba nia-nain mak imi ba foti, tamba ho tauk STS intrega kareta ba arguidu” no fó osan atus rua ($200) ba STS nia kolen durante fulan ida, no STS informa kedas ba lezadu nia espoza.

Rona tiha leitura akordaun juiz husu ba Ministériu Públiku ho Defensoria Públiku, atu fiksá fali loron 17/04/2018 (09:00h).

Julgamentu ne’e prezide husi Juiz Dr. Álvaro Maria Freitas, Ministériu Públiku, Dr. Matias Soares, arguidu hetan asinténsia legal hosi Defesor Públiku Jeral, Dr. Abílio de Jesus Pereira. (Media PJR/Luis Soares)