Díli-Tersa-feira, (16/10/2018) foin lalais ne’e, Sentru Estudu ba Dame no Dezenvolvimentu (CEPAD) ne’ebé lidera hosi Diretór ezekutivu, João Boavida ho Membru Grupu Konsultivu Nasionál (GKN) halo vizita kortezia ba Prokuradoria-Jerál Repúblika hodi husu apoiu Polítika morál nian husi Prokuradór-Jerál Repúblika, Dr. José da Costa Ximenes, atu nune’e ekipa GKN bele hamriik fórte liután hodi kombate krime korrupsaun iha nasaun Timor-leste.
Iha vizita ne’e, Prezidente GKN, João Boavida informa objetivu importante ba vizita ida-ne’e mak “atu hakbiit integridade transparénsia no responsablidade iha setór públiku liuhusi Ministériu hitu ne’ebé halibur a’an, atu nune’e iha tempu badak ka naruk nia laran ita bele proporsiona no providénsia atmosfera ba situasaun ne’ebé ita hamutuk ho Ministériu Públiku (MP) bele hamenus korrupsaun iha setór públiku”, Informa Prezidente GKN.
Nia akresenta tan katak setór públiku dadaun ne’e sai alvu ba komunidade tomak no timoroan hotu, nu’udar fatin ne’ebé fertil ba korrupsaun kolusaun no nepotízmu ne’ebé sai preokupasaun boot ba ita, tanba ne’e GKN husu ba PJR atu haree mós asuntu importante ne’e.
Tuir Prezidente katak, korrupsaun hanesan krime extraordináriu ida, “korrupsaun hanesan ita hotu hatene katak krime extraordináriu ida liuhusi GKN ida-ne’e ami mós hakarak husu ba ita boot atu fó mós tratamentu espesiál extraordináriu ida ba krime ida-ne’e, atu nune’e ita bele minimiza iha tempu tuirmai’’ nia dehan.
Iha biban ne’e mós, Prokuradór-Jerál Repúblika, Dr. José da Costa Ximenes informa mós kona-ba Serbisu importante sira ne’ebé MP hala’o mak, Serbisu espesializadu no alargamentu territoriál, tuir planu estratéjika ne’ebé mak atribui ba MP.
Prokuradór-Jerál Repúblika akresenta mós kona-ba asesu justisa ne’ebé seidauk sufisiente iha país ida-ne’e, “asesu ba justisa seidauk sufisiente iha Timor-Leste, ne’e tanba sei iha populasaun barak mak seidauk hetan asesu iha serbisu setór justisa nian, no susar tebtebes tanba razaun distánsia, tanba ne’e tuir planu estratéjiku reitera fali diagnóstiku ne’ebé temi ona iha Planu Estratéjiku tinan-2011 to’o tinan-2030 ne’ebé aprova husi Konsellu Koordenasaun ba Justisa, iha fulan-Fevereiru, tinan-2010’’, tenik PJR.
Iha okaziaun ne’e PJR mós informa ba GKN katak planu estratéjiku MP nian hakarak hakbesik justisa ba ita-nia komunidade, “MP buka hakbesik liután justisa ba komunidade sira, tanba ne’e MP instala ona iha Distritu haat, hanesan; Díli, Baucau, Suai no Oekusse, iha mós serbisu ne’ebé instala ona iha Munisípiu sira hanesan; Bobonaro, Ermera no Viqueque, MP buka atu implementa tan planu espansaun progresivu ida ba ninia serbisu sira iha futuru. (Media MP).