Dili-Atu hemetin kooperasaun servisu iha ámbitu komisaun Funsaun Públika (KFP) ho Prokuradoria Jerál Repúblika (PJR), nune’e ohin kuarta-feira (01/08/2018), asina ona Nota Memorandu Entedimentu (NME) ida hodi formaliza no hametin liután kooperasaun servisu entre instituisaun rua ne’e hodi garante kualidade servisu iha nasaun Timor-Leste.
Molok asina NME ida-ne’e, Prokuradór Jerál Repúblika (PJR), Dr. José da Costa Ximenes iha ninia intervensaun katak, asinatura NME ne’e hanesan formalidade de’it, tanba antes ida-ne’e, instituisaun rua ne’e iha ona kooperasaun di’ak, “Kooperasaun servisu entre KFP ho Prokuradoria Jerál Repúblika, normalmente hala’o tiha ona, nune’e NME ne’ebé asina atu haluan liután ami-nia kooperasaun”, dehan Prokuradòr Jerál Repúblika, liuhosi konferénsia imprensa.
Prokuradór-Jerál Repúblika akresenta tan, asina NME ida-ne’e atu reforsa liuliu iha ámbitu defeza integridade funsaun públika, hodi haree kona-ba kestaun disiplinár ho kriminál, ne’ebé prosesu disiplinár hela ba KFP no prosesu Kriminál hela ba MP, tanba ne’e iha futuru oinsá mak implementa hamutuk memorandum ida-ne’e ho di’ak, dehan Prokuradór-Jerál Repúblika.
Iha fatin hanesan, Prezidente Komisaun Funsaun Públiku Dr. Faustino Cardoso Gomes, informa tan, asina NME ida-ne’e hanesan formalidade de’it, tanba kooperasaun institusionál antes ne’e la’o di’ak hela to’o agora.
“Ami-nia asina NME ida-ne’e ho nia objetivu atu hakle’an no reforsa kooperasaun instituisaun rua ne’e hodi partilla informasuan entre KFP ho PJR liga ho esperiênsia profisionál entre kuadru rua no koordenasaun iha asaun promosaun integridade Funsaun Públika hodi haree ba efisiénsia no efikásia servisu sira ne’e” dehan Prezidente KFP.
Prezidente KFP tenik tan, “iha kooperasaun ne’e atu foka liu ba servisu sira seluk hanesan prevensaun ba asédiu seksuál iha Funsaun Públika, koordenasaun iha asaun ba implementasaun desizaun judisiál sira relativa ho funsionáriu públiku no ajente Administrativu no formasaun ba investigadór sira, tenik nia.
Aléinde ne’e, molok asina NME refere, Adjunta Prokuradór Jerál Repúblika (APJR), Dra. Zélia Trindade ho nia ekipa marka ona enkontru ida ho Prezidente Komisaun Funsaun Públiku, Dr. Faustino Cardoso Gomes ho ekipa tékniku sira KFP nian iha loron 27/07/2018 hodi diskuti kona-ba NME ida-ne’e. (Media PJR).