Díli-Ajensia KOICA Internasionál fó apoiu orsamentu dólar Amerikanu rihun tolunulu (30 Mil) ne’ebé mak transforma ba ekipamentu Information Center Teknologi (ICT) ba Prokuradoria Jerál Repúblika (PJR), doasaun ne’e hanesan komprimisu KOICA nian tanba antes ne’e Prokuradoria Jerál Repúblika ho KOICA asina ona nota memorandum entendimentu.
“Doasaun orsamentu rihun tolunulu ne’e, Ajensa KOICA fó liuhosi ekipamentu ICT, tanba ami asina ona memorandum entendimentu iha fulan hirak liuba, ekipamentu sira ne’ebé instala ona iha sala sentru ICT ne’e la’ós limita de’it ba funsionáriu públiku sira ne’ebé servisu apoiu Prokuradoria Jerál Repúblika nian, maibé mós fó ba ita nia ofisiál justisa, nune’e mós ba ita-nia Majistradu sira ne’ebé foun”, PJR haklaken lia hirak ne’e hafoin ramata serémonia lansamentu sala ICT iha edifisiu Kolmera Kuarta-feria 27/09/2018.
PJR solisita tan katak “ohin sira ko’alia ho ha’u iha espasu barak sira mós bele fó aumenta tan uitoan, ida-ne’e mak ajuda ka doasaun hosi KOICA ba dala uluk nian, ita hatene tinan-tinan ita sempre depende de’it ba ita-nia OJE, ohin loron ita depende ba duodésimu, kooperasaun ida-ne’e fó mós solusaun ba ita-nia difikuldade sira ne’ebé ita iha”.
Iha okaziaun ne’e mós PJR husik hela mensajen ba Prokuradór Repúblika ho Ofisiál justisa no mós funsionáriu sira MP nian, hodi aproveita didi’ak ekeipamentu ne’ebé iha, tanba instituisaun balun ema oferese ekipamentu ba sira tinan rua, tinan tolu sasan sira ne’e dezaparese, tanba ne’e sasan sira ne’e tau iha fatin seguru atubele aproveita didi’ak sasan sira ne’e,
Iha fatin hanesan, Diretór KOICA Timor-Leste, Kim Sikhyon, hatete katak, doasaun ne’e hanesan simbolu amizade entre Timor-Leste ho Korea, “hato’o mós ha’u-nia agradese no apresiasaun ba Prokuradór-Jerál Repúblika ho nia funsionáriu hotu, ba imi-nia suporta no asisténsia mai KOICA ho nia voluntariu, tanba halo amizade di’ak ona durante tinan rua nia laran, hanesan susesu simboliku ida hosi atividade voluntariu ne’e mak amizade ida di’ak entre Korea no Timor Leste”, Dehan Kim.
Kim Sikhyon akresenta tan katak, “iha sosiedade modernu agora ne’e, ICT la’ós opsaun, maibé sai hanesan nesesidade ona, ho ida-ne’e ha’u hato’o hosi sentru treinamentu PJR ida-ne’e bele sai fatin ne’ebé signifikante tebes no planu ba funsionáriu sira iha Prokuradoria Jerál Repúblika, bele sai dalan di’ak ida maske ki’ik ba governu Timor-Leste, ha’u espera katak administrasaun Prokuradoria Jerál Repúblika bele ajuda ema barak liután, no funsionáriu hot-hotu bele asesu no utiliza sentru ICT PJR hodi bele dezenvolve sira-nia kapasidade” tenik nia.
Ekipamentu informátiku sira ne’ebé KOICA oferese mak hanesan; komputador marka Samsung unidade 13 inklui monitor (s), mouse no keyboard (s). impresora unidade 4 (s), Notebook unidade 11 (s), Beam Projector unidade 1, tool set of network unidade 10 (s), 3 Network access point wifi unidade 3 (s), televizaun unidade 2, external harddisk storage unidade 3 (s), UPS unidade 6 (s), headphones unidade 10 (s).