Baukau, Timor-Leste – Tribunál Distritál Baukau (TDB) iha Jullu 2017 liuhosi ninian akordaun kondena argidu ho inisiál LMM tama kadeia tinan 16 tanba provadu halo krime abuzu seksuál hasoru vítima TA, ne’ebé natoon ne’e foin tinan 10 (iha 2016).
Tuir leitura akordaun nian, insidente abuzu seksuál hasoru minoridade ne’e mosu iha Aldeia Asaloki, Suku Abafala (Kelikai) iha Agostu 2016.
Liuhosi leitura akordaun, Tribunál Distritál Baukau (TDB), ne’ebé fó-sai iha 14 Jullu 2017, LMM hetan kondenasaun iha primeira instánsia ho pena kastigu tinan 16 ba kadeia tanba provadu nu’udar autór materiál ho forma konsumada ba krime abuzu seksuál ba menór, tuir Artigu 177 (nú. 1), 182 (nú. 1 al. 1) hosi Kodígu Penál.
Julgamentu ne’e hala’o hosi juís koletivu ne’ebé prezide hosi juís Afonso Carmona, ho ninian membru sira kompostu hosi juís José Gonçales no juíza Ersilia de Jesus. Iha leitura akordaun ne’e, Ministériu Públiku reprezenta hosi Dr. Alfonso Lopez no arguidu hetan asisténsia legál hosi Defensór Públika. (Média PJR)