Maliana-Tuir data estatistika Prokuradoria Repúblika Distritu Bobonaro hatudu katak kazu Violensia Domestika (VD) a’as iha Munisipiu Maliana tamba komunidade sira iha ona koñesementu klean konaba papél Ministeriu Publiku (MP) nian iha Distritu refere, nune’e iha problema entre fen ho laen sempre prosesu tuir dalan justisa nian.
Krimi violensia domestika a’as iha Munisipiu Maliana tamba komunidade iha koñesementu klean konaba justisa “krimi Violensia Domestika a’as tamba ema gosta baku malu, fen gosta baku laen, laen gosta baku fen ou tanba ema komesa hatene ona katak kualker violensia ne’ebé mak mosu iha uma laran labele rezolve iha uma laran, tenke levanta ba polísia ho MP”, hatete Prokuradór Repúblika, João Marques iha nia knar fatin Prokuradoria Repúblika Distritu Bobonaro, tersa feira, (06/02/2018) foin lalais.
Iha okaziaun ne’e, Prokuradór Republika ne’e halo mos komparasaun krimi violensia domestika ho Munisipiu seluk hanesan, Same no Ainaro, “Agora ita kompara de’it Ainaro ho Same, iha ne’ebá kazu menus ne’e dehan katak ema la halo problema lae, tamba distansia do’ok, tamba ne’e mak ema la aprezenta keixa. sekarik iha Same ne’ebá ita hari delegasaun ida, klaru numeru kazu ne’e kuaze hanesan deit”.
Prokurador Republika ne’e afirma tan katak “iha parte ida ita nia komunidade sira komesa hatene ona, tanba dalaruma barak liu ne’e kuandu problema mosu, sira ba iha xefe suku, xefe aldeia sira rezolve iha ne’ebá hotu, agora se rezolve iha ne’ebá tuir lei labele tanba krimi ne’e tama ona iha krime públiku ona tenke ba oin,”, afirma Prokurador Repúblika, João Marques,
Entertantu, kooperasaun entre Polísia Nasionál Timor-Leste (PNTL), Unidade Polisia Fronteira (UPF), Alfandega ho Prokuradoria Distrital Suai nia delgasaun iha Maliana lao di’ak tebes, hodi haree ba krimi sira ne’ebé akontese iha munisípiu Maliana, “ami nia kooperasaun ho instituisau sira seluk lao di’ak tebes, hanesan UPF, PNTL ho Alfandega,
Iha parte seluk, tuir Komandante Superintendente PNTL, Armando Monteiro, katak durante nia presenza iha Munisípiu Maliana sempre kolabora di’ak ho Instiruisaun Judisiáriu sira, “Durante hau mai iha ne’e, hahú hosi tinan-2015 to’o 2018, servisu entre Prokuradoria Distritál Maliana ho PNTL ami nia koordenasuan no komunikasaun sempre lao ho di’ak, maibé sei iha asuntu teknika balun ne’ebé presija ita atu prioritiza nia seriedade ba problema ne’ebé mak parte seguransa deskobre no aprezenta ona ba MP ne’ebé nain ba prosesuál tomak” hateten Komandande PNTL ne’e iha ninia knar fatin.
Iha biban ne’e mos, komandadente ne’e husu atu aumnetan númeru majistradu MP nian, tamba agora dadaun iha munisipiu Maliana krimi kontra bandu no Violensia Domestika komesa aumenta, ”Hau husu nafatin atu parte MP, Tribunál ho PNTL mantein nafatin komunikasaun no kooperasaun hodi bele halo prevensaun ba kriminalidade sira ne’ebé akontese iha ita nai nasaun soberania ida ne’e, nune mos iha Municipiu Maliana, presija aumenta tan numeru majistradu MP nian tamba krimi Violensia Domestika ho krimi kontra bandu aumenta a’as ba bebeik, karik mak ejistensia MP nian ho majistradu ida deit mak sei difikulta ba servisu prosesuál tomak”. (Media PJR/Mariano da Conceição)