Tibar, Liquisa- Iha Sesta-feira, loron-25, fulan-Janeiru, tinan-2019, Konsellu Superiór Ministériu Públiku (KSMP) hala’o enkontru anuál tinan-2018 iha Tibar, Postu-Administrativu Liquisa Vila, Munisípiu Liquisa.
Objetivu husi enkontru ida-ne’e ko’alia kona-ba servisu KSMP durante tinan-2018, ne’ebé hato’o kona-ba progresu ne’ebé mak atinji ona no dezafiu hirak ne’ebé mak KSMP enfrenta iha tinan-2018.
Iha intervensaun Prokuradór-Jerál Repúblika, Dr. José da Costa Ximenes hateten katak “Retiru anuál ida-ne’e hodi ko’alia kona-ba servisu KSMP iha tinan-2018, Aprezentasaun planu atividade Prokuradoria-Jerál Repúblika ba tinan-2019, Servisu apoiu tékniku adminístrativu (SATA), Analiza dadus estatístiku produtividade majistradu MP nian, Analiza dadus estatístiku Prokuradoria Distritál sira no mós majistradu MP nian ba servisu tinan-2018”.
Kona-ba Planu atividade MP, PJR hato’o katak “Mapamentu Servisu MP defini ona, maibé oinsá ho planu MP nian hodi promove no garante servisu Prokuradoria-Jerál Repúblika no planu refere sei integra ba iha atividade ida ne’ebé sei dezenvolve husi KSMP, hodi garante Boa Jestaun Rekurusu Umanu MP no hadia Servisu ne’ebé presta husi kuadru pesoál MP no hala’o promosaun ba majistradu sira MP nian.
Iha Retiru ida-ne’e, Inspetora MP, Dra. Angelina Joanina Saldanha mós aprezenta Relatóriu Anuál KSMP nian hateten katak; Konsellu Superiór Ministériu Públiku (KSMP) nu’udar Órgaun Superiór ba jestaun no dixiplina majistratura Ministériu Públiku nian, hodi halo lista kona-ba nia kompeténsia, no funsionamentu servisu inspesaun nian; liuhusi Regulamentu Internu PJR nian, ne’ebé hetan aprovasaun hosi Deliberasaun n.º 07/D/CSMP/I/2008, iha loron-30, fulan-maiu tinan-2008.
Enkotru da-toluk ne’e, prezide hosi Prokuradór-Jerál Repúblika, Dr. José da Costa Ximenes hanesan mós Prezidente Konsellu Superiór Ministériu Públiku (KSMP) nian, ne’ebé hetan partisipa husi membru sira KSMP nian mak hanesan; membru ne’ebé hili hosi majistradu Ministériu Públiku nian mak Dr. Nelson de Carvalho hanesan vise Prezidente (KSMP), no Dr Matias Soares, membru dezignadu hosi Prezidente Repúblika mak, Dra. Maria Fátima Correia no membru ne’ebé hili hosi governu mak Dr. Rui Pereira dos Santos no membru ne’ebé hili hosi Parlamentu Nasionál mak Dr. José Augusto Fernandes Teixeira, akompaña husi Diretora Jerál, Ana Maria Pereira de Carvalho. (Media PJR)