DILI, MP – Prokurador Jerál Repúblika José da Costa Ximenes halo enkontru ho Prezidente Komissaun Funsaun Públiku Faustino Cardoso ho nia ekipa tékniku sira iha salaun enkontru Konsellu Superior Ministériu Públiku (KSMP), iha loron Tersa (30/01/18) foin lailais ne’e.
Objetivu prinsipal hosi enkontru ida ne’e maka “atu reforsa liu tan entermus servisu públiku nian ho funsaun públiku, nune’e Ministériu Públiku iha rejime espesial nomós rejime jerál, tuir dekretu lei no.6 2010, hala’o servisu apoiu tékniku administrasaun, no mantein nafatin relasaun servisu entre instituisaun rua ne’e, no relativamente ho kazu korrupsaun balu nian informa ba funsaun públiku hodi haree, karik iha akuzasaun.” Hatete PJR.
Iha kuadru Prokurador Jerál Repúblika iha funsionáriu públiku ne’ebé servisu hodi estabelese funsionamentu Prokuradoria Jerál Repúblika nian kompostu hosi funsionáriu públiku nain rua, aumenta majistradu ida, antes ne’e hanesan fiskalizasaun. Felismente iha funsionáriu públiku hamutuk ema nain 78, ho ofisial justisa ne’ebé iha Prokuradoria Distrital haat no Prokuradoria Distritu tolu, totalmente ofisial justisa hamutuk 96, hosi 96 ne’e nain rua tuir formasaun, no majistradus sira hamutuk 32.
Kona-ba servisu SATA nian ne’ebé kábe ba Prokuradoria Jerál Repúblika atu bele halo analiza ba nesesidade instituisaun nian, no bele hamosu mapa pesoal nian tuir nesesidade instituisaun nian.
Servisu SATA nian maka hanesan mákina operasional ba servisu iha Prokuradoria Jerál nian enkuantu funsionárius kontratadu hamutuk ema nain 39, tamba hahú hosi tinan 2015 to’o agora, governu hapara prosesu rekrutamentu funsionáriu públiku, tamba ne’e halo rekrutamentu ba kontratadu sira hodi fo apóiu ba instituisaun liu-liu iha administrasaun nian.
Iha fatin hanesan Prezidente Komissaun Funsaun Públiku Faustino Cardoso, hatete katak “liu hosi enkontru kooperasaun hira ne’e maka funsaun públiku buka aktualiza nafatin, jeralmente kona-ba polítika foun ne’ebé komissaun funsaun públika hamosu alterasões ba diploma foun sira, atualiza liu hosi estrutura ne’ebé iha, importante kona-ba jestaun rekursu umanu ne’ebé funsaun públiku presiza atualiza nafatin jestaun hotu ne’ebé iha.” Hatete P-KFP.
Agora dadaun iha ona proposta regulamentu ida kona-ba Planeamentu Forsa Traballu, hodi nune’e funsaun públika ne’ebé agora iha ne’e bele iha nafatin sustentablidade la tau ba risku finanséiru estadu, sé kuandu la iha, instituisaun ida-idak halo tuir vontade, entaun bele lori estadu monu ba risku finanséiru, tamba ne’e maka funsaun públiku hato’o ona ba Primeiru Ministru hodi diskute. Reforsa P-KFP. (Média PJR/Maria Lin)