DILI – Prokuradór–Jerál Repúblika (PJR), José da Costa Ximenes, delega Prokuradór Repúblika Rogério Viegas Vicente hodi hato’o liafuan abertura ba treinamentu ne’ebé realiza hosi ONG Sentru Estudu ba Pás no Dezenvolvimetu (akrónimu hosi Portugés, CEPAD) ba jornalista investigativu sira ho nia tema “Hakbiit Koñesimentu Média ba Prevene no Kombate Korrupsaun iha Timor-Leste”, iha Tower, Fatuhada, tersa (19/09/2017).
“Média nu’udar instrumentu ida ne’ebé di’ak atu hasa’e koñesimentu públiku bainhira fó sai informasuan ne’ebé kredível ba asuntu korrupsaun. Liu hosi treinamentu refere, ha’u husu ba ita boot sira atu aproveita oportunidade ho di’ak atu nune’e bele aumenta tan koñesimentu hodi fó sai informasaun ne’ebé kredível ba públiku, atu nune’e labele halo konfuzaun komunidade sira”, dehan Prokuradór Repúblika ne’e.
Iha okaziaun ne’e mós, Rogério Viegas Vicente informa tan katak, notísia ka informasaun ruma ne’ebé relasiona ho kazu korrupsaun mak seidauk iha desizaun finál hosi Tribunál, presiza jornalista sira rai privasidade ema nian, maske iha ita nia Konstituisaun RDTL regula ona iha artigu 41 kona ba liberdade inprensa, maibé segredu ema nian ita hanesan jornalista tenke rai no kuidadu, hatete Prokuradór Repúblika ne’e.
Prokuradór Repúblika ne’e reafirma tan katak, artigu 36 Konstituisaun RDTL koalia mós kona-ba direitu ba onra no privasidade, nune’e bainhira publika atu hatete dehan ema ruma komete duni krime korrupsaun, koluzaun no nepotizmu (KKN) ne’e presiza tebes halo investiga informasaun ne’ebé klean, hodi to’o ikus ita konklui tuir fontes ne’ebé ita iha tuir provas balu ne’ebé ita hetan ne’e.
Aleinde ne’e, iha artigu 34 Konstituisaun RDTL mós koalia kona-ba kestaun KKN, dalabarak posesu ne’e publika iha media sira, konserteza nia tarjetu oinsá mak bele haree nia prosedimentu krime nian relasiona ho kazu ne’ebé mak jornalista sira publika.
“Perspetiva Ministériu Públiku nian haree ba infornasaun ne’ebé mak ita boot sira publika ba sosiedade, ami uza ida ne’e mós hanesan dalan ida no fontes ida bele haklean hodi apoiu mós ami nia servisu iha prosesu investigasaun ne’ebé ami konsidera uza kanál ida hodi atribui ba MP hanesan ajente ba iha krime ninian no nain ba prosesu penál hodi halo investigasaun ne’ebé mais profundu bazeia ba informasaun ne’ebé ita boot sira fó sai, tanba ne’e presiza tebes jornalista investigativu sira nia esforsu aan hodi divulga informasaun ne’ebe kredível no investigativu”, nia dehan. (Media PGR)