DILI  ̶  Prokuradór-Jerál Repúblika José da Costa Ximenes, hato’o relatóriu mensal ba Prezidente Repúblika Francisco Guterres Lú-Olo, iha Palasiu Prezidente Ai-tarak laran, Dili, iha loron Kuarta (6/06/2018) foin lailais ne’e.

Iha enkontru ne’e Prokurador Jeral Repúblika hato’o katak depois kampaña eleitoral to’o elisaun, Ministériu Públiku rejista kazu krime eleitoral hamutuk 14, entre kazu 14 ne’e, kazu 11 akontese iha Munisípiu Dili, rejista ona iha Prokuradoria Distrital Dili, kazu rua akontese iha Munisípiu Baukau no rejista ona iha Prokuradoria Distrital Baukau, no kazu ida seluk akontese iha RAEO  ne’ebé rejista ona Prokuradoria Distrital Oe-cusse. Kazu sira ne’e agora dadaun iha hela prosesu investigasaun.

Prokuradór -Jeral Repúblika informa katak durante iha faze kampaña eleitoral akontese mós kazu balun, exemplu hanesan kazu ofensas, estragus, akontese mós kazu pekulatu uzu, mais laiha relasaun ho kampaña eleitoral.

Alende ne’e Prokuradór-Jerál Repúblika hato’o  mós ba Prezidente Repúblika katak “Ministériu Públiku halo protestu formal ida ba Provedoria Direitus Umanus no Justisa (PDHJ) relasiona ho deklarasaun ne’ebé halo iha loron-18, fulan-Abril, tinan- 2018, katak iha funsionáriu Ministériu Públiku nian, MSS, nomós Obras Públika, partisipa iha kampaña eleitoral. Hakarak esklarese katak laiha no lalos, funsionáriu Ministériu Públiku nian partisipa iha kampaña eleitoral, deklarasaun ne’ebé PDHJ hato’o ne’e lalos, no to’o ohin loron Ministériu Públiku seidauk simu relatóriu ida konaba funsionáriu Ministériu Públiku nian partisipa kampaña eleitoral”. Hateten PJR.

Iha biban ida ne’e Prokuradór-Jerál Repúblika aproveita informa mos konaba formasaun ba kandidatu  juiz, prokurador, no defensór ne’ebé pasa ona hamutuk ema nain 13 formandus, no Ministériu Públiku hetan Prokurador  nain lima atu hahú faze pratika ne’ebé sei hahú husi loron-11, fulan-Juñu, tinan-2018 to’o loron-14, fulan-Juñu, tinan-2019. Hein katak ho sira nia prezensa bele haforsa tan kuadru Ministériu Públiku, no bele apoiu liu tan Ministériu Públiku ba atendimentu públiku ne’ebé diak liu ba ita nia sosiedade. (Media PJR/Maria Lin)