MANUFAHI – Tribunál Distritál Suai hala’o Julgamentu movel iha kuartel PNTL Munisípiu Manufahi, Ministériu Públiku akuza arguidu ho krime lima hanesan furto agravado, dano com violência, roubo, burla agravado e usurpação imovel, ho Numeru Nuc :0016/16.PNSIC, iha loron Tersa 27/03/2018 foin lailais ne’e.
Akuzasaun husi Ministériu Públiku katak Arguidu ho inisiál VJ, kolega di’ak ho lezadu ho Inisiál VHRN, iha konsorsiu nasionál Manufahi, iha loron 17/05/2016, ne’e lezadu hetan telefone husi nia aman informa katak arguidu lori ema kuaze 20 hodi mai tau plaka iha lezadu nia uma no armajen no hadau tiha kareta ho sapa matrikula 59.354 TLS, kareta ne’ebé hola iha tinan 2015 ho osan montante rihun rua-nulu resin haat ($24.000), kada loron ida ema aluga ho foli atus tolu lima-nulu (350).
Iha loron 21/07/2016, arguidu ba iha lezadu nia armajen iha suku Daisua hodi troka kadiadu odamatan armajen. Lezadu nia sasan ne’ebé iha armajen nia laran ne’e iha lista ne’ebé aneksu iha prosesu laran, hamutuk ho nia folin momtante rihun neen-nulu atus-sia hitu nulu ($60.970), depois prosesu ne’e la’o, arguidu hamutuk ho ema lubun ida ba baku armajen nia kotuk no naok hotu sasan iha armajen nia laran no foti sasan ne’ebé teni iha akta nia laran.
Iha loron 25/08/2014, foti tan lezadu nia Bronjon hamutuk atus tolu (300) no promete atu selu iha loron 31/12/2015, no arguidu bosok lezadu ho nune’e lezadu hodi hato’o keixa kontra arguidu ho total osan montante hamutuk, rihun atus ida rua-nulu resin neen, tolu-nulu resin ualu ($126.038).
Arguidu halo hahalok ne’e ho forma livre deliberadamente hadau lezadu nia kareta, rai, baku rahun no hasai sasan iha armajen, foti bronjon no laselu, rezulta lezadu soke prezuizu materiál ne’ebé ho folin elevadu.
Arguidu hatene katak hahalok ne’e lei bandu no hetan kastigu tuir lei maibé arguidu kontinua prátika assaun ne’e, tamba ne’e Ministériu Públiku akuza arguidu ho krime lima hanesan furto agravado, dano com violência, roubo, burla agravado e usurpação imovel.
Hafoin rona tiha akuzasaun hosi Ministériu Públiku, hosi prezuiju ne’ebé mak mósu, tribunál husu arguidu atu selu ho osan montante dolar rihun neen-nulu atus-sia hitu-nulu ($60.970).
Nune’e arguidu mós hato’o ho loloos ba tribunal katak, foti kareta ne’e los, foti sasan iha armajen ne’e los, hau foti hodi atu sai garansia ba hau nia osan ne’ebé mak ho montante rihun sia-nulu (90.000) ne’ebé mak lezadu foti no halo tia ona akordu ida atu bele devolve fila fali iha loron 1-2/07/ 2016.
Entretantu lezadu dehan osan ho montante rihun sia-nulu ($90.000) ne’e la’os deve, iha momentu konsorsiu kria enkontru ida iha Dili, Timor Plaza, iha ne’ebá Prezidente Konsorsiu mak arguidu, sira obriga hau atu asina osan ho montante rihun sia-nulu ($90.000) hau lahatene los kona-ba motivu husi asina osan ho montante ne’ebé boot.
Iha julgamentu ne’e sasin polisia OPS suku Daisula ho inisiál AJS deklara ba tribunál katak iha momentu ne’ebá arguidu telefone direta ba lezadu atu marka prezensa iha lezadu nia armajen hodi observa katak didin-lolon kuak no fatin ne’e abandonadu nakonu hó foer, distansia uma mai armajen kuaze 100m.
Sasan iha armajen laran ne’e ho kondisaun ladi’ak tanba roda sira a’at no rai u’ut mak kaer hela ba. Nune’e mós arguidu informa mai hau katak fatin ne’e hau tenke tau plaka ida atu nune’e ema labele hadau fatin refere, no arguidu tau mós plaka ida iha lezadu nia uma ne’ebé mak lezadu nia inan-aman hela bá. Informa mós arguidu ba foti lezadu nia kareta truk ida maibé sasin haree katak laiha violensia ida ba lezadu nia kondutor refere.
Julgamentu refere juiz prosesual haree katak faktus sira husi lezadu ne’e mak nakonu ho notas koitansi hodi hakat ba prosesu civil tama ba indimnizasaun ne’e juiz husu lezadu tenke aprezenta sasin sira kona-ba aluga kareta atu hatene lolo’os tebes kalae ba notas koitansi sira ne’ebé mak lezadu aneksu iha prosesu nia laran.
Julgamentu refere adia ba loron 11/04/2018 oras (09:00H) sei kontinua iha Tribunál Distritál Suai.
Julgamentu prezide hosi juiz Dr. Álvaro Maria Freitas, Ministériu Públiku, Dr. Matias Soares, arguidu hetan asinténsia legal hosi Defensor Públiku Jeral, Dr. Manuel Amaral. (Media PJR/Luis Soares)