Hera-Iha loron 30 fulan Maiu 2018, Prokurador Repúblika, Dr. Pascásio Alves, fó formasaun ba FALINTIL Forsa Defeza Timor Leste (F-FDTL) Komponente naval, ne’ebé hala’o iha Hera.

Tema ba formasaun ida nee mak “Generalidade, kuidadu, apreensaun no detensaun iha ámbitu espesífiku marítima”. Portantu, hanesan orador iha formasaun refere, Dr.Pascasio Alves aborda materia sira ne’ebé liga ho servisu prinsipal husi Komponente Naval nian. Materia ne’ebé mak hato’o iha formasaun ne’e mak koalia kona-bá oinsá forsa armada, liu husi Komponente Naval bele koopera hamutuk ho autoridade polísia hodi halo apreensaun no detensaun ba bens ka ema wainhira mosu krime ruma akontese iha tasi laran liu-liu kuandu krime ne’e akontese iha zona marítima territorial Timor Leste nian.

Hanesan orador, iha ninia introdusaun hato’o katak F-FDTL mak garante independénsia nasional, integridade territoriál, liberdade no seguransa populasaun sira nian husi agressaun no ameasa externa. Portantu, Konstituisaun bandu atu F-FDTL inklina a’an ba kualker partidu sei la hetan intervensaun husi polítika no ida ne’e hanesan baze fundamental ne’ebé hakerek no hatu’ur iha ita nia Konstituisaun art. 146. No art. 1 husi Lei n. 3/2010, loron 21 Abril, kona-bá Lei Defeza Nasional.

Hato’o mos katak para alem de Konstituisaun no Lei, akordu sira no tratadu husi direitu internasional sira ne’ebé vigora tuir ita nia órdem jurídiku mós estabelese kona-bá karakterístika forsa Armada F-FDTL ho sentidu atu garante ita nia integridade territoriál, liberdade no seguransa populasaun nian husi agresaun no ameasa externa.

Maioria partisipante husi formasaun ne’e kompostu deit husi ofisíais sira iha komponente naval nian, nune’e aproveita okaziaun refere, membru F-FDTL sira ne’e koloka kestoens no perguntas oin-oin no hetan respostas husi formador.

Objetivu husi formasaun refere mak oinsá membru F-FDTL sira bele iha kuñesimentu iha materia prossesual penal nian nomós formasaun ida ne’e hanesan formasaun komplementar ida atu bele prienxe rekizitus ba iha promosaun karreira. (Responsável/formador)