Railaku – Ministériu Públiku halo retiru anual ho tema; “Avaaliasaun Dezafiu, Progresu tinan 2017, Forsa no Korajen, Infrenta Dezafius tinan 2018,” retiru ne’e halo iha salaun CCT – NCBA Railaku, Munisípiu Ermera, iha loron Sexta (12/01/18) foin lailais ne’e.
Retiru ne’e hahú hosi loron 12 to’o 13 Janeiru tinan 2018, ho objetivu atu avalila efisiensia, efikasia, progresu, no dezafiu ne’ebé Prokuradores, ofisial justisa, no funsionárius Ministériu Públiku infrenta durante tinan 2017, no espetativa ba futuru hosi instituisaun ne’e ba tinan 2018.
Abertura ba retiru ne’e maka Prokurador Jerál Repúblika Dr. José da Costa Ximenes, no akompaña hosi Adjunta Prokurador Jerál Repúblika, Dra. Zélia Trindade, no Inspetora Ministériu Públiku, Dra. Angelina Joaninha Saldanha.
Hosi abertura ne’e Prokurador Jerál Repúblika José da Costa Ximenes halo intervensaun katak “objetivu retiru ne’e atu tur hamutuk hodi haree oinsá servisu iha tinan 2017 nia laran, hodi hadia, no deskute oinsá ba tinan 2018 nian,” hatete PJR.
“Kestaun ne’ebé ita hare maka kontinua hametin servisu Ministériu Públiku nian iha meius hotu-hotu kada administrasaun ida-idak nian, sáida maka halo ona iha tinan 2017, no sáida maka atu halo iha tinan 2018 hodi tulun administrasaun Ministériu Públiku, tulun majistradus sira, fó apoiu malu.” Hatete PJR
Nune’e mós husu ba kuadru Ministériu Públiku katak favor tenki respeita instituisaun, unidade, fó liman ba malu, buat ne’ebé ladiak, buka hadia, buka solusaun hodi resolve entre kuadrus Ministériu Públiku.
“PJR mós preokupa liu kona-ba étika deontolójia, preokupa mós kona-ba kapasidade, partilla sáida mak ita halo hodi koalia ba malu no hadia ita nia instituisaun, iha tinan ida ne’e ita fóka ba kestaun rua, hanesan; avaliasaun progresu ne’ebé ita iha ona, forsa ne’ebé mak ita iha ona iha 2017, no dezafiu sáida mak ita iha, estratéjia sáida mak ita iha hodi infrenta dezafiu, konsolida ita nia forsa para hasoru dezafiu.” PJR subllina.
PJR mós aumenta tan katak problema ne’ebé importante liu, tenki tau prioridade hodi resolve, hanesan iha tinan kotuk edifisiu Prokurador Distrital ne’ebé mak grave-liu maka Prokuradoria Distrital Maliana no Prokuradoria Distritu Ermera nian.
Kapasitasaun ba majistradus sira liu hosi kursu maibé tenki identifika area ida ne’ebé importante.
Husu ba Prokurador Distrital no Distritu sira ida-idak mós tenki tur hamutuk hodi resolve problema ki’ik ne’ebé infrenta iha Distrital. PJR salienta.
Kestaun balun konaba mudansa eskalaun ba ofisial justisa, depois Prokurador Jerál sei lori ba deskute iha Konsellu Superior Ministériu Públiku (KSMP). Hatete PJR
Iha retiru ne’e kontinua kedas ho sesaun dahuluk nian aprezentasaun hosi Administrasaun Jerál Ministériu Públiku ne’ebé aprezenta hosi Diretóra Jerál Sra. Ana Maria de Carvalho, Gabinete Kontensiozu Estadu hosi Dra. Zélia Trindade (Adjunta PJR), Gabinete Kombate Korrupsaun hosi Dr. Jacinto Babo.
Depois remata aprezentasaun hosi Gabinete Kontensiozu, Gabinete Kombate Korrupsaun, hafoin tama ba sesaun husu no hatan perguntas.
Alende ne’e, iha loron daruak nian sei iha aprezentasaun relatóriu anuál hosi Prokuradoria Distrital sira hanesan; Prokuradoria Distrital Dili aprezenta hosi Dr. Alfonso Lopez, Prokuradoria Distrital Baukau aprezenta hosi Dra. Ivónia Guterres, Prokuradoria Distrital Suai aprezenta hosi, Dr. Matias Soares no Prokuradoria Distrital Oecussi aprezenta hosi Dr. Mateus Nessi.
Tuir ajenda, ativatidade retiru ba loron daruak nian sei hahú iha tuku sia dadeer to’o remata.
Partisipasaun ba retiru ida ne’e, partisipa hosi Prokurador Distrital no Distritu sira, Prokurador Repúblika sira, Diretóres sira, Xefi Gabinete Prokurador Jerál Repúblika, Xefi Departementu sira, inklui pesoál tékniku sira, no funsionárius sira iha ámbitu Ministériu Públiku. (Media PJR/Maria Lin)