Díli – Prokuradór Jerál Repúblika, José da Costa Ximenes, kuarta feira (04/07/2018) foin lalais ne’e, hato’o progresu servisu Ministériu Públiku (MP) nian ba Prezidente Repúblika (PR), Francisco Guterres Lú-Olo, durante fulan Juñu nia laran no hato’o mós kona-ba Movimentu kazu krime sira ne’ebé mak MP rejistu iha fulan neen nia laran hamutuk Prosesu 2.300 resin, entre kazu sira ne’e  Prokuradoria Distritál Dili (PDD) mak rejistu númeru prosesu aas liu.

Prokuradór Jerál Repúblika relata katak, kazu entrada barakliu mak iha  PDD hamutuk rihun-ida-atus-tolu resin, tuir fali Prokuradoria Distritál  Baukau rejistu prosesu hamutuk atus-haat i besik atus-lima, nune’e mos iha  Prokuradoria Distritál Suai ho prosesu hamutuk atus-tolu resin ne’ebé rejistu durante fulan neen nia laran no Prokuradoria Distritál Oekusi rejistu prosesu ne’ebé kiik liu, hatete Prokuradór Jerál Repúblika hafoin ramata reuniaun ho PR iha Aitarak Laran Dili.

Haree ba prosesu ne’ebé tama hamutuk rihun-rua resin ne’e barakliu mak MP finaliza ona. Entre prosesu rihun-rua resin ne’e MP konsege halo akuzasaun rihun-ida-atus-hat resin no arkivu prosesu hamutuk rihun-ida-atus-ida iha territóriu tomak, nune’e mós, Gabinete Sentrál Kombate Korrupsaun no Kriminalidade Organizada (GSKKKO) durante fulan neen rejistu prosesu sianulu-resin-neen no termina prosesu hatnulu-resin-hitu, iha prosesu ruanulu-resin-lima mak akuza tiha ona, arkiva  prosesu ruanulu-resin-rua. Ne’e mak rejultadu pozitivu ne’ebé  MP halo durante ne’e. Realsa Prokuradór Jerál Repúblika.

Iha okaziaun ne’e mós, Prokuradór Jerál Repúblika, apela ba inan-aman sira atu kontrola oan-feto sira, tanba dala barak ona mak krimi violasaun seksuál akontese ba menór idade sira, tanba foin lalais ne’e akontese krimi violasaun seksuál  iha Munisípiu Baucau, “menór hamutuk ruanulu resin tolu ho kazu violasaun seksuál, ida ne’e hanesan avizu ba inan-aman sira ne’ebé iha oan feto idade kiik tenke kontrola didi’ak, tanba krimi ne’ebé akontese ba labarik sira  sai vitima ne’e menus hosi tinan-16 ”, Apela Prokuradór Jerál Repúblika.

Iha biban ne’e mós, Prokuradór Jerál Repúblika preokupa tebetebes ho kazu konkretu  balun, ne’ebé involve sidadaun Indonésia (Alor), hatama ikan ilegál hosi tasi mai Timor-Leste, nune’e MP promove prizaun preventiva, maibé Tribunál Distritál Dili (TDD) fó-sai desizaun finál hodi desidi fó pena tinan tolu no suspende ba tinan tolu. “Ami la simu tanba ema ne’e halo bebeik ona no ami halo rekursu maibé TDD altera ba tinan 10, bainhira desizaun Tribunál sai, arguidu halai lakon ona, tanba Tribunal mak haruka ema sai hosi prizaun preventiva, ida-ne’e hanesan preokupasaun boot mai MP. Desizaun judisiál sira ne’e di’ak tebetebes maibé sira la konsege ezekuta”, dehan Prokuradór Jerál Repúblika. (Media MP/Mariano da Conceição)