SUAI – Prokuradór Repúblika Distritál Suai, Matias Soares, iha tersa-feira (30/05/2017) sai oradór ba Semináriu Rejionál “Knaar Parlamentu Nasional iha Prosesu Halo Lei no Kna’ar Autór Judisiáriu sira iha Sistema Justisa Formál”. Eventu refere, ne’ebé realiza hosi NGO Justice System Monitoring Program (JSMP) ho apoiu Australian Aid nian, hetan partisipasaun hosi lideransa lokál sira área munisípiu Manufahi, Ainaro no Kovalima.
Iha ninia aprezentasaun ne’e, Prokuradór Distritál Suai esplika kona-ba Ministériu Públiku nia papél no atribuisaun sira iha Setór Justisa, aleinde fó informasaun relasiona ho krime sira ne’ebé baibain akontese iha komunidade sira no oinsá mak lideransa lokál sira bele fó kontribuisaun ba Setór Justisa. Ikus mai, Soares mós hato’o kona-ba diferensa entre krime públiku no semi-públiku, violénsia doméstika no labarik minoridade sira ne’ebe abandona hela, no fó korajen atu lideransa komunitária sira bele hato’o kazu sira hanesan ne’e ba iha Ministériu Públiku.
Hosi parte Xefe Suku Hatudu nian, Munisípiu Ainaro, deklara nia sente orgulho tebes no agradese tanba seminariu ne’e importante tebes ba membru konselho suku sira atu nune’e sira bele hatene uituan konaba justisa, servisu Parlamentu Nasionál nian no bele asesu ba justisa formál. Hósi partisipante sira ne’ebé halibur iha Salaun Enkontru Munisípiu Kovalima hamutuk ema na’in 37, inklui xefe suku, membru konsellu suku no delegado/a sira, mós hato’o sira nia difikuldade hanesan oinsá bele rezolve problema kona-ba rai nian ne’ebé sempre mosu iha baze, aleinde kestiona mós kona-ba kazu balun ne’ebé pendente iha Polísia no Lei Pensaun Vitalísia.
Sai oradór iha Semináriu ne’e Prokuradór Distritál Suai, Juis Administradór Tribunál Distritál Suai, Álvaro Maria Freitas, no Diretór Ezekutivu JSMP, Luis de Oliveira Sampaio. (Média PJR)