DILI, MP – Ministériu Públiku liu hosi Prokuradoria Jerál Repúblika assina akordu kooperasaun ho Governu Kareanu liu hosi Korea Organization International Cooperation Agency (KOICA), assina akordu kooperasaun ne’e hala’o iha sala reuniaun Konsellu Superior Ministériu Públiku (KSMP), iha loron Kuarta (31/01/18) foin lailais ne’e.
Objetivu hosi assina akordu kooperasaun ne’e atu hadia fasilidade Prokuradoria Jerál Repúblika hodi dezenvolve kapasitasaun ba departementu Servisu Sentral Informasaun no Komunikasaun (SSIS).
Akordu ne’e assina hosi Prokurador Jerál Repúblika José da Costa Ximenes, no Ambaixador Korea ba Timor-Leste Sr. Lee Chin Bum, liu hosi organizasaun Korea nian Sr. Kyungmoo Jun, Diretór KOICA.
Apoiu ne’ebé KOICA fó iha faze dahuluk nian mak hanesan apoiu tékniku volontariu hosi KOICA, Sr. Hyung Gyu Park, iha departementu servisu sentral Informasaun no komunikasaun nian ba tékniku sira hodi fahe nia matenek nomós esperiensia, transfêrensia ne’e benefisiu tebes.
Alende ne’e KOICA mos sei fo apoiu liu hosi formasaun no kapasitasaun iha area ICT nian, formasaun ne’e sei realiza hahú hosi fulan Janeiru to’o Novembru iha tinan 2018 nia laran, hosi Prokuradoria Jerál Repúblika sei prepara fatin hodi estabelese sentru trinamentu informátika (ICT) hodi bele kompleta liu tan nesesáriu formasaun nian.
KOICA mós sei oferese sasan ekipamentu material oi-oin ba treinamentu hanesan komputador, laptops, mákina impressora, no ekipamentu IT nian ne’ebé sensituvu liu.
KOICA mós sei fó apóiu finaséiru ho montante $30.000.00, Dolar Amérikanu, katak ho aprovasaun orsamentu tinan fiskal nian tuir governu Korea nian, no Prokuradoria Jerál Repúblika sei reponsabliza ba orsamentu ne’ebé tuir mai. (Média PJR/Maria Lin)