Díli, Timor-Leste – Prokuradór Jerál Repúblika José da Costa Ximenes entrega sertifikadu louvór no apresiasaun ba funsionáriu sira hosi Ministériu Públiku, Ministériu Negósiu Estranjeiru no Kooperasaun no PNTL tanba ho exelente organiza ona eventu Enkontru Jerál hosi Prokuradór Jerál Repúbika CPLP nian foin lailais ne’e iha Dili, Timor-Leste.
PJR entrega sertifikadu hirak ne’e liuhosi eventu disolusaun Komisaun Organizadora ne’ebé hala’o iha Hotel Timor iha Sesta (11/11/2017) liubá.
PJR dehan, “susesu ne’ebé ita iha ultrapasa hosi ita-nia espetativu ne’ebé merese ita-nia orgullu, no tanba ne’e ho ida-ne’e fó rekoñesementu hosi xefe ka delegasaun hosi Prokuradór Jerál sira CPLP nian ne’ebé partisipa, inklui Prokuradór hosi Rejiaun Administrativa Espesiál Makau.”
“Palavra de louvór ida ne’e la’ós diriji de’it mai ha’u mesak, maibé diriji mós ba komisaun organizadora sira hotu no partisipasaun sira hotu dezde preparasaun no ezekusaun ba eventu ida ne’e la’o” PJR kontinua.
Iha Prokuradór Jerál Repúblika hosi Estadu Membru CPLP nian halo deliberasaun hodi fó rekoñesimentu ba traballu ne’ebé ekipa téknika halo relasiona ho enkontru jerál ne’e, partikulármente relasiona ho organizasaun, protokolu no seguransa.
PJR hatutan katak rekoñesementu hosi PJR CPLP nian ne’e la’ós hato’o hosi liafuan de’it maibé haktuir mós iha akta kona-ba enkontru ne’e rasik.
PJR Timor-Leste hetan nomeasaun hosi Enkontru Jerál XIV iha Lizboa iha 2016 hodi sai Prezidente ba PJR CPLP no atividade kulminante hosi prezidénsia ne’e mak organiza Enkontru Jerál XV PJR CPLP iha Dili, Timor-Leste hosi 25 to’o 27 Outubru 2017.
Prokuradoria estabelese ekipa téknika iha forma Komisaun Organizadora Enkontru Jerál XV PJR CPLP ne’ebé xefia hosi Adjunta PJR Zélia Trindade nu’udar Prezidente Komisaun Organizadora. Nu’udar Prezidente Komisaun Organizadora, Adjunta hetan koajuvasaun hosi Dra. Angelina Saldanha, atuál Inspetora MP, nu’udar Primeira Vise-Prezidente no Dr. Alfonso Lopez nu’udar Segundu Vise-Prezidente.
Tuir Prezidente Komisaun Organizadora, Timor-Leste organiza eventu Enkontru Jerál ne’e ho di’ak no PJR rekoñese servisu di’ak ne’ebé hala’o no fó louvór ba Prokuradoria Jerál, espesiálmente Komisaun Organizadora.
“Agradese wain no louvór ba servisu ne’ebé (ita hotu halo) ho exelente, tanba fó resultadu di’ak ba ema hotu-hotu” Adjunta PJR dehan.
Funsionáriu sira hamutuk na’in 73 hosi, inklui asesór sira to’o kondutór mak hetan sertifikadu rekoñesementu no louvór ne’e, hosi totál 103 ne’ebé mai hosi funsionáriu sira MNEK no PNTL.
Maske Enkontru Jerál ne’e rasik hala’o iha 25 Oubtrubu, delegasaun balu hahú to’o iha Dili hosi 23 Outuru 2017 no hela iha-ne’e to’o 28 Outubru 2017.
Komisaun Organizadora rasik estabelese iha Augusto 2017 no serbisu hamutuk ho entidade relevante seluk ho prepara eventu Enkontru Jerál XV hosi PJR CPLP nian efetivamente iha periodu fulan rua nia laran. (Média PJR/Luis Soares)