Dili, iha Kinta, Loron-10, fulan-Janeiru, tinan-2019 – Prokuradór-Jerál Repúblika Dr. José da Costa Ximenes, fó pose ba Inspetora Ministériu Públiku (MP), Dra. Zélia Trindade, Prokuradór Distritál Suai (PDS), Dr. Jose Elo no Dr. Mateus Nessi ne’ebé kontinua ninia mandatu ba daruak iha Prokuradoria Distritál Oecusse (PDO).
PJR hateten katak, “kargu Inspetora ne’e hodi haforsa liután servisu Inspesaun MP nian, nomeiasaun ne’e halo tuir estatutu Majistradu MP nian, ne’ebé mak tenke mai husi Primeira klase, nune’e, iha loron-22, fulan-Dezembru, tinan-2018, KSMP nomeia ona Dra. Zélia Trindade ba kargu hanesan Inspetora MP nian ba komisaun servisu durante tinan tolu”.
PJR fiar katak ho esperiénsia ne’ebé iha, Dra. Zélia bele asume responsabilidade ida ne’e ho di’ak no bele servisu hamutuk ho Inspetora Dra. Angelina Joanina Saldanha.
“Ho forma ida ne’e MP marka tan istória ida iha tinan-2019, tanba timoroan mesak mak asumi ona kargu Inspetora MP nian no Asesór Internasionál sira ajuda de’it kona-ba kestaun téknika balun ne’ebé mak ita presiza”. dehan Prokuradór-Jerál Repúblika
PJR hateten liután katak, hahú Timor-Leste hetan Indepéndensia iha tinan-2000 no tuirmai harii Instituisaun Judisiáriu no iha tinan-2004 hahu hala’o prosesu formasaun. Iha tempu ne’eba ita hetan tulun barak husi Asesór Internasionál sira no liuhusi politíka ne’ebé ita iha ohin loron ne’e timoroan sira mós bele ona asume rasik kargu sira importante ne’e no iha oportunidade hodi promove Prokuradór Distritál sira no bele lori Instituisaun ne’e sai di’ak liutan iha futuru.
Iha fatin hanesan, emposada, Dra. Zélia Trindade nu’udar Inspetora foun hateten katak, “ohin loron ha’u simu ona pose ba Inspetora MP nian, no kargu ida ne’e ha’u hetan liuhusi desizaun Konsellu Superiór Ministériu Públiku (KSMP) nian ne’ebé mak fó ona konfiansa ba ha’u, ida ne’e hanesan previleiju boot ida, atu bele kontribui ba MP liu-liu kona-ba Papél Inspetora nian”.
Inspetora foun ne’e dehan liután katak, “servisu ida ne’e hanesan servisu pedagójika ida ne’ebé mak importante tebes hodi haree no fiskaliza servisu MP no oinsá atu haree ba servisu méritu Prokuradór sira nian, servisu ida ne’e nu’udar ami nia funsaun hanesan inspetora. Esforsu ida ba ha’u rasik atu bele servisu oinsá hodi hetan rezultadu ida ne’ebé di’ak no oinsá atu bele dezenvolve servisu MP nian la’o ho di’ak liu, kualidade no garante duni legalidade iha ita-nia rain”.
Dra. Zélia Trindade antes ne’e haknaar ona nu’udar Adjunta Prokuradór-Jerál Repúblika hahú hosi tinan-2012 to’o 2018, no ninia mandatu nu’udar Adjunta Prokuradór-Jerál Repúblika ne’e termina ona iha loron-28, fulan-Setembu, tinan-2018.
Aleinde fo pose ba Dr. Zelia Trindade, iha biban ne’e Prokuradór-Jerál Repúblika mós fó pose ba Dr. Mateus Nessi hodi kontinua ninia mandatu ba daruak nu’udar Prokuradór Repúblika Distritál Oe-Cusse no Dr. José Elo sai nu’udar Prokuradór Repúblika Distritál Suai hodi troka Dr. Matias Soares ne’ebé mak termina ona ninia mandatu iha loron-01, fulan-Janeiru, tinan-2019.
Iha ninia intervensaun PJR hateten katak “Prokuradór Repúblika Distritál iha responsabilidade atu koordena no fiskaliza intervensaun Ministériu Públiku nian iha Distritu nune’e funsionamentu Prokuradoria Repúblika Distritál depende ba iha medida di’ak kona-ba ninia jestaun sira”
Iha serimonia tomada-de-pose ne’e hetan partisipasaun husi Defensór Publiku Dr. Cancio Xavier, Adjuntu PJR, Inspetora MP, Prokuradór Distritál Baucau no Prokuradór Repúblika sira, membru KSMP no mos hetan partisipasaun husi kargu Diretór no xefia sira. (Media PJR)