Dilí – Iha Kinta, loron-31, tinan-2019, Prokuradór-Jerál Repúblika Dr. José da Costa Ximenes, fó pose ba Prokuradór Estajiáriu na’in – 5 hodi apoiu servisu MP nian.
Iha ninia intervensaun PJR hateten,“Ha’u kontente tanba Prokuradór estajiáriu na’in lima ne’e bele mai reforsa liután servisu MP nian”.
Iha Biban ne’e PJR mós dehan katak “Konsellu Superiór Ministériu Públiku (KSMP) aprova ona deliberasaun balun atu nune’e Prokuradór estajiáriu sira ne’e bele hahú hala’o ona sira-nia knaar nu’udar Prokuradór Estajiáriu hodi reprezenta MP nian iha tribunál, no KSMP mós aprova deliberasaun pedagójiku ne’ebé Públika iha loron-18, fulan-Janeiru, tinan-2019, ne’ebé hatudu katak Prokuradór estajiáriu na’in-5 liu ona husi faze estájiu”. KSMP mós hili ona Prokuradora Dra. Lidia Soares hodi sai nu’udar Koodenadora ba Prokuradór estajiáriu na’in-5 ne’e durante períodu tinan ida.
PJR mós husu ba Prokuradór sira ne’ebé akompaña Prokuradór estajiáriu na’in-5 ne’e atubele akompaña ho didi’ak tanba ita mak mai uluk no hafoin ne’e sira mai tuir, no sira sei mai hamutuk ho ita iha knua ida de’it iha MP, Prokuradór balun sei reforma iha futuru mai, nune’e ita boot sira mak sei kontinua nafatin, respeita malu no hatudu katak ita hamutuk ida de’it iha MP.
Iha fatin hanesan Prokuradór estajiáriu Dr. Claudio do Rosário dehan “ knaar ne’ebé ami simu nakonu ho responsabilidade boot ida hodi defende legalidade perante direitu ema nian, maibé ami iha esperansa katak buat ne’ebé mak ami aprende, ami bele hala’o iha faze prátika bé tuirmai”.
Prokuradór estajiáriu ne’e hateten mós katak, hanesan ema umanu sempre iha difikuldade maibé difikuldade ida ne’e bele motiva ami hodi bele halo esforsu liután, difikuldade sai hanesan meius ida atu ami buka maneira ne’ebé di’ak liu hodi bele rezolve difikuldade ne’ebé ami infrenta.
Iha serimónia tomada-de-pose hetan partisipasaun husi Adjuntu (PJR) Dr. Alfonso Lopez, Inspetora MP Dra. Angelina Joanina Saldanha, Membru (KSMP) Dra. Maria Fátima Correia no Dr. Rui Pereira dos Santos, Prokurador Distritál Dili (PDD) Dr. Jacinto Babo , Prokurador Distritál Baucau (PDB) Dra. Remizia de Fatima, Prokurador Distritál Suai (PDS) Dr. José Elo, Responsabilidade GCCCCO Dr. Aderito Tilman, Responsabilidade Kontesiozu estadu, Dr. Pascásio Rosa Alves, Asesór Internasionál, no Diretora Jerál no kargu Xefia sira. (Media PJR)