DILI – Prokuradór-Jerál Repúblika, José Da Costa Ximenes, segunda-feira (19/06/2017) ofisialmente fó tomada de posse ba António Pedro Borges, hosi Kabu Verde, atu integra provizóriamente kuadru majistradu sira Ministériu Públiku Timor-Leste.
António Pedro Borges iha esperiénsia besik tinan-15 iha Ministériu Públiku Kabu Verde nian, no iha ne’ebá nia mós okupa ona kargu vise-prezidente Konsellu Superiór Ministériu Públiku.
“Nia esperiénsia barak no diversifikada ho ninia atributu sira hanesan majistradu kompetente, integro no dedikadu mak abilita Dr. António Pedro Borges ba funsaun sira aas ne’ebé nia simu dadaun. Ha’u serteza katak sr. majistradu empossadu sei esforsu másimu hodi ezerse ninia funsaun sira ne’e no, nune’e, sei konfirma desizaun di’ak Konsellu Superiór Ministériu Públiku nian hodi hili nia ba kargu ne’ebé nia sei okupa”, tenik PJR durante serimónia tomada de posse ne’e, ne’ebé hala’o iha Salaun Enkontru Prokuradoria Jerál Repúblika, Kolmera.
Objetivu prezensa majistradu ne’e mak atu sai hanesan Inspetór interinu iha Servisu Inspesaun nian, troka fali ho majistradu internasionál uluk nian, ne’ebé hala’o servisu Inspetór Ministériu Públiku no ajuda dezenvolve mós Sekretariadu Konsellu Superiór Ministériu Públiku (KSMP) durante tinan ualu nia laran.
PJR esplika katak kontratasaun majistradu internasionál empossadu ne’e hodi garante funsionamentu Servisu Inspesaun nian labele paradu, hodi disiplina no kestaun progresaun no promosaun la’o nafatin ho normalidade, no akresenta katak agora momentu atu loke faze ida foun hodi koloka majistradu timoroan mak atu hala’o rasik Servisu Inspesaun MP nian. Nia mós hato’o katak mudansa ne’e presiza tempu atu asegura tranzisaun la’o didi’ak, nune’e hafoin KSMP identifika tiha majistradu nasionál balun atu hala’o servisu ne’e, planu mak majistradu internasionál ne’e sei orienta estájiu preparasaun hodi majistradu timoroan sira ne’ebé atu hili bele preparadu bainhira assume funsaun importante ne’e. (Média PJR)