Maliana — Prokuradór Jerál Repúblika (PJR), José da Costa Ximenes, halo reuniaun koordenasaun ho PNTL Komandu Bobonaro, Unidade Patrulla Fronteira, Servisu Karantina no Alfándega iha Segunda (28/8/2017) foin lailais ne’e hodi koordena servisu entre auoridade sira atu responde ba krime oioin ne’ebé akontese iha fronteira entre Timor-Leste no Indonézia. 

Tuir PJR, enkontru koordenasaun ne’e hala’o atu autoridade sira ne’ebé partisipa bele halo diskusaun no troka hanoin kona-ba krime oioin ne’ebé dala-barak mosu iha área fronteira hanesan fraude fiskál, deskamiñu no kontra-bandu.

Kona-ba krime fraude fiskál, PJR haktuir katak krime ida-ne’e sai hanesan preokupasaun boot ba Timor-Leste tanba ema no sasán barak ne’ebé tama liuhosi fronteira Maliana no Mota-Ain dala-ruma la selu impostu.

 “Ema ne’ebé ajuda fó fatin ba ema ne’ebé mak la selu impostu ne’e fraude fiskál,” PJR dehan.

PJR husu atu parte Alfándega bele deteta ema sira ne’ebé la selu impostu no obriga sira selu impostu tuir lei sira ne’ebé aplikável iha Timor-Leste.

Kona-ba deskamiñu PJR fó hanoin katak ema ne’ebé subar hosi dalan legál nian mak ezemplu hosi deskamiñu no husu atu parte Alfándega deskobre ema sira ne’ebé partisipa iha prátika ida-ne’e atu partisipa mai iha polísia ka haruka diretamente ba Prokuradór Repúblika sira iha Delegasaun Prokuradoria Distritál Bobonaro.

Kona-ba krime kontra-bandu, PJR hatete katak krime ne’e akontese bainhira la liuhosi dalan legál nian, purezemplu lori tama sasán sira ilegál mai iha Timor-Leste, hanesan motorizada, gazolina, gazoel no droga.

PJR enkoraja atu ema ne’ebé de’it mak hatene kona-ba krime ida-ne’e, inklui uza karreta ka motorizada no prende tanba kontra-bandu, atu bele partisipa diretamente bá iha polísia ka Ministériu Públiku.

Kona-ba mina hirak ne’ebé parte PNTL, liuliu eskuadra Bobonaro no UPF hadau, PJR husu atu entrega lailais ba Estadu.

“Ha’u halo ona enkontru internamentu horseik ho ha’u nia prokuradór repúblika sira atu ami fó deadline to’o loron 31 Dezembru kompletu hotu hanesan mina ha’u sei la hetan tan litru ida iha eskuarda hotu-hotu no ha’u ko’alia ona ho Tribunál Rekursu atu ita buka mekanizmu oinsá mak rezolve kestaun hirak ne’e,” PJR hatete.

Relasiona ho ema sira ne’ebé envolve iha krime oioin iha fronteira, komandante PNTL Munisípiu Bobonaro Superintendente Xefe Armando Monteiro haktuir katak sasán hirak ne’e barak tebes mak na’in la iha tanba bainhira polísia halo aprensaun sira, ema sira halai lakon hodi soe hela sira-nia sasán nune’e to’o agora sira la hatene sé loos mak na’in.

Depois reuniaun koordenasaun ne’e, PJR ho komitiza disponibiliza sira an hodi bá haree serbisu fatin PNTL Komandu Bobonaro nian hodi observa sasán sira ne’ebé durante ne’e PNTL prende, hanesan mina-rai, gazoel, gazolina, motorizada, no selseluk tan.

Depoizde ida-ne’e, PJR no komitiva mós habiban sira an hodi halo vizita ba servisu-fatin UPF nian hodi haree sasán ilegál oioin ne’ebé Unidade PNTL ne’e prende, hanesan gazolina, mina-rai, gazoel, motorizada, no selseluk tan. (Média PJR/Mariano da Conceição)