Beijing – Prokuradór-Jerál Repúblika (PJR), José da Costa Ximenes, halo enkontru ho ninian omólogu Prokuradór Jerál Repúblika Populár Xina, Dr. Cao Jianming, iha marjin hosi Konférensia Anuál dala 23 no Enkontru Jerál hosi Asosiasaun Internasionál Prokuradór sira nian ne’ebé hala’o iha Hotel Beijing, Xina.
Iha sorumutuk ne’e, PJR Timor-Leste no Prokuradór Jerál Repúblika Populár Xina ko’alia kona-ba esperiénsia no prátika di’ak Ministériu Públiku hosi rai rua ne’e posibilidade atu halo kooperasaun bilaterál entre país rua ne’e iha futuru iha área jurídika.
PJR haktuir katak ho posibilidade kooperasaun ne’e, Ministériu Públiku Timor-Leste bele kontinua fó prioridade nafatin ba fortalesimentu institusionál no kapasitasaun ba ninian kuadru sira, espesiálmente ba majistradu sira.
“Timor-Leste hanesan país foun ne’ebé iha hela prosesu konstrusaun no tan ne’e hakarak atu kontinua hametin ninian instituisaun no mós ninian kuadru sira seluk, espesiálmente eleva kapasidade hosi ninian majistratura sira sai nu’udar prioridade ida,” PJR dehan.
PJR mós haktuir tan katak liuhosi enkontru ne’e iha Timor-Leste hetan koñesementu, harii rede serbisu profisionál globál no mós fahe esperiénsia no prátika di’ak hodi fomenta kooperasaun bilaterál oioin iha futuru.
“Portantu, enkontru ne’e haree liu ba posibilidade oinsá mak Timor-Leste no Xina bele fahe informasaun no esperiénsia ba malu iha tempu sira tuirmai,” PJR dehan. (Média PJR)