DILI – Prokuradór-Jerál Repúblika (PJR), José da Costa Ximenes, iha kuarta-feira ne’e (20/09/2017), hala’o reuniaun ho Prezidente Parlamentu Nasionál foun, Aniceto Guterres, iha Gabinete Prezidente Parlamentu Nasionál.

Tuir PJR, enkontru ne’e nia sentidu ida mak atu komprimenta, lori instituisaun Prokuradoria Jeral Repúblika no Ministériu Públiku nia naran, hato’o parabens ba Prezidente Parlamentu foun ne’ebé foin dadaun hetan eleitu, depoiz mós objetivu ida tan mak atu konvida Prezidente Parlamentu atu halo abertura ba XV Enkontru Prokuradór-Jerál Repúblika Komunidade País Lian Portugés sira (CPLP), ne’ebé sei realiza iha Dili hosi loron-25 to’o loron-27, fulan-outubru. Iha okaziaun hanesan, Prezidente Parlamentu konfirma kedas nia disponível halo abertura ba Enkontru ida ne’e.  

“Bainhira ita koalia kona-ba kooperasaun instituisaun nian, Prokuradór-Jerál Repúblika hakarak mantein nafatin kooperasaun ho órgaun instituisionál la’os de’it ho Tribunál Rekursu, Governu, Prezidente Repúblika, maibé ho mós Parlamentu Nasionál, tanba halo diskusaun orsamentu, diskusaun ba planu estratéjiku ba setor justisa nian, konserteza presiza hetan tulun no apoiu hosi Parlamentu Nasionál”, dehan PJR.

Relasiona ho ida ne’e, Prezidente Parlamentu Nasionál hateten katak ita iha órgaun soberanu haat, ida mak Tribunál, no Prokuradoria Jerál hanesan mós parte ida hosi Tribunál, entaun hanesan enkontru entre órgaun sobrania rua ne’ebé atu hametin liu tan kooperasaun institusional, liu-liu iha área justisa ninian. (Maria Lin/ Media PJR)