Díli-Prokuradór-Jerál Repúblika (PJR), Dr. José da Costa Ximenes, sesta-feira, (12/10/2018) hasoru malu ho Ministru Justisa (MJ), Manuel Carceres hodi diskuti kona-ba planu Ministériu Públika (MP) nian ne’ebé atu harií tan delegasaun Prokuradoria iha Munisípiu Lautém-Lospalos.

Iha hasoru malu ne’e, Prokuradór-Jerál Repúblika informa ba Ministru Justisa kona-ba planu estratéjiku MP nian, “enkontru ne’e ko’alia kona-ba serbisu balun iha MP no planu estratéjiku ba setór justisa, nune’e mós atu reforsa serbisu espesializadu MP nian no alargamentu territoriál no husu apoiu MJ nian hodi defende no suporta MP iha komisaun revizaun”, hateten Prokuradór-Jerál Repúblika ba jornalista sira hafoin ramata reuniaun iha edifisiu MJ.

PJR afirma tan katak “iha tinan oin sei estabelese tan Prokuradoria Repúblika Distritu Lautém-Lospalos, tanba ne’e mak ami-nia hasoru malu ne’e atu informa ba MJ atu oinsá bele suporta ami iha komisaun revizaun orsamentu ba alargamentu territoriál, bainhira ko’alia kona-ba serbisu espesializadu ita hatene ona katak, MP mak hanesan Sentrál kombate korrupsaun no kriminalidade organizadu sira”, afirma nia.

Iha fatin hanesan, Ministru Justisa, Manuel Carceres  akresenta tan katak “iha enkontru ne’e ko’alia kona-ba serbisu ida-idak nian iha konsellu koordenasaun justisa ne’ebé mai hosi Prokuradór-Jerál Repúblika, Prezidente Tribunál Rekursu no Ministru Justisa, tanba ne’e mak ami hasoru malu hodi troka hanoin ba malu kona-ba serbisu iha setór justisa nian, nune’e Prokuradór-Jerál Repúblika husu MJ nia kolaborasaun atu bele serbisu hamutuk iha setór justisa atu nune’e setór justisa bele la’o lalais iha futuru’’. informa Ministru Justisa iha nia serbisu-fatin.

Iha okaziaun ne’e PJR hato’o ba MJ kona-ba planu PJR nian atu harií tan Prokuradoria Repúblika Distritu Lautém-Lospalos, nune’e mós PJR husu atu iha Konsellu Ministru, MJ bele ko’alia asuntu ida-ne’e.

Ministru Justisa dehan, “PJR hakarak halo uluk edifísiu Prokuradoria Repúblika Distritu Lautém-Lospalos, ida-ne’e ha’u apoiu teb-tebes, tanba ita destaka ema ba serbisu iha ne’ebá tenke iha fatin, hafoin realiza tiha planu MP nian, nune’e sei haree fila-fali planu Defensoria Públiku nian atu oinsá bele harií nia edifisiu ho obrigatoriu”, Nia dehan.

Iha biban ne’e mós MJ husu ba PJR atu haree ba prosesu atribuisaun sidadania ne’ebé sei pendente hela “ha’u husu ba PJR atu haree prosesu pendente kona-ba ita-nia maluk sira ne’ebé atribui sidadania, ha’u informa ba PJR katak iha prosesu atus tolu (300) mak Ministru Justisa atu halo atribuisaun sidadania ba ita-nia maluk estranjeiru sira ne’ebé kaben ho timoroan atu oinsá bele sai sidadania timorense, tanba ne’e mak ha’u husu ajuda ba PJR kona-ba kazu sira ne’ebé pendente hela, hodi halo verifikasaun lalais, tanba atribuisaun sidadania timorense ba ita-nia maluk sira ne’e kleur liu ona, to’o agora balun iha bei-oan ona maibé sira seidauk hetan sidadania timorense, afirma Ministru Justisa, (Média MP).