Díli-Prokuradór Jerál Repúbliku (PJR) José da Costa Ximenes, informa progresu servisu Ministériu Públiku (MP) nian ba Prezidente Repúblika (PR), iha palasio Prezidente Nicolau Loubato, segunda feira (08/05/2018) foin lalais relasiona ho prosesu sira ne’ebé rejistu iha MP durante fulan Abril tinan 2018 nia laran.
Iha biban ne’e, ha’u hato’o ba PR kona-ba informasaun anuál, Prokuradoria Jerál Repúblika nian ne’ebé sei enkamina ba Parlamentu Nasionál (PN) hafoin ramata eleisaun antisipada mak bele aprezenta informasaun anuál ba iha komisaun permanente maibé depende ba Prezidente Parlamentu Nasionál, tamba informasaun anuál preparadu ona, hein de’it informasaun atu lori ba aprezenta iha uma fukun PN, hatete PJR ba jornalista sira hafoin ramata reuniaun ho PR.
Iha okaziaun ne’e, PJR informa mós kona-ba kazu kontentór sia (9) ne’ebé mak aruigudu nain tolu halai tiha ba Indonesia, Tribunál Rekursus altera tiha ona dezisaun primeira instansia ba kazu kontentór 9 ba arguidu nain tolu ne’ebé halai tiha ona ba Indonesia maske Timor-Leste laiha akordu ida ho Indonesia atu buka tuir arguidu sira ne’e hodi entrega fila fali no arguidu nain rua maka Tribunál Rekursus altera primeira instansia no agora sira kumpri ona pena, ida Timoroan no ida seluk sidadaun Indonesia, agora iha ona prizaun maibe prosesu ba investigasaun kontinua la’o”. Dehan PJR.
Nune’e mos PJR akresenta tan fali katak iha arguidu rama-ambon ida depois nia kumpri ona pena, nune’e sai husi prizaun komete fali krime droga, nune’e semana kotuk liuba PNTL kaptura ona nia hodi kumpri nia hahalok ne’e iha prizaun preventiva.
“Arguidu rama-ambon agora dadaun iha ona prizaun preventiva portantu iha nivél nasionál prosesu hotu ne’ebé ita haree MP preukupa no atua, servisu hamutuk ho Polisia Investigasaun Kriminál ita sempre atua, hotu-hotu ita haree katak nia bele fó efeitu ka estraga ba ita nia estabilidade”, tenik PJR
Aliende ne’e, PJR hato’o mos Situasaun durante eleitorál nian ba PR katak MP rejistu ona kazu eleitorál balun no iha ona prosesu investigasaun, depois halo investigasaun hotu se mak sala ita haree se ida ne’ebé mak ita akuza no ida ne’ebé mak ita arkiva tau iha provas arkiva.
Hatan ba informasaun sira ne’e, Prezidente Reúblika, Francisco Guterres Lú-Olo, preukupa tebes krime sira ne’ebé mosu ho natureza sira hanesan ne’e no PR fó nafatin nia suporta ba setór justisa hodi kombate krimi organizada ho tipu sira hanesan ne’e. (Media PGR/Luis Soares)