Dili–Prokuradór Jerál Repúblika (PJR), José da Costa Ximenes, informa progresu servisu Ministériu Públiuku (MP) no relatoriu anuál 2017 nian ba Prezidente Repúblik, Farancisco Guterres Lú-Olo, iha Palasiu Prezidente Nicolau Lobato, segunda-feria (05/03/2018) foin lailais ne’e.
“PJR informa ba Prezidente Repúblika, agora dadaun MP prepara hela informasaun anuál ba Parlamentu Nasionál, tanba komisaun permamente sei funsiona hodi informa atividade MP durante tinan 2017”, hatete Prokuradór Jerál Repúblika hafoin ramata enkontru ho PR.
Iha okaziaun ne’e, Prokuradór Jerál Repúblika informa mos produtividade rezultadu servisu Majistradus MP nian, “agora dadaun ita iha prosesu rihun rua atus ualu (2.800) mak pendente, iha Prokuradoria Distritál Dili, Baukau no Suaí, kazu pendente maioria Dili mak okupa primeiru ho prosesu rihun rua (200), korespondente ho Prokuradór sanulu resin haat (14), Baukau ho prosesu atus rua sia nulu (290) korespondente ho Prokuradór nain hat (4), Suai ho Prosesu atus tolu (300), korespondente ho Prokuradór nain rua (2), no kazu sira ne’ebé a’as liu iha nivél hotu-hotu mak ofensa integridade, tuir-kedas violênsia domestíka,” PJR hato’o.
Iha biban ne’e mos Prokuradór Jerál Repúlika akresenta mos kona-ba prosesu sira ne’ebé mak delega ba Komisaun Anti Korrupsaun (KAK) “iha tinan 2017 ita delega ba KAK prosesu totál rua nulu resin ualu (28), nune’e prosesu rua nulu resi hat (24) sira konsege determina, sira ne’ebé determina ona MP haree no analiza fila-fali presiza kompleta investigasaun kalae, la dehan katak sira investiga hotu ona ita akuza kedan, Prokuradór sira mak sei depende akuzasaun sira haree kompletu ona kalae, agora dadaun halo hela analiza, ida ne’ebé presiza akuza, no prosesu balun presiza kompleta tan investigasaun antes halo akuzasaun”, hato’o PJR.
Servisu ne’ebé delega ba KAK balu fo informasaun adisionál, balu sai hanesan testemuña, balun hanesan arguidu, balun akuza ona, balu hein de’it julgamentu iha tribunál no balun arkiva sira nia prosesu ida ne’ebé mak informasaun adisionál ami sempre fó, sira ne’e hanesan materia investigasaun sei sujeita ba segredu justisa, maibe ne’e la’os Eis membru governu de’it, balu mós diretór no funsionáriu”, tenik Prokuradór Jerál Repúblika. (Média-PJR/Luis Soares).