Dili, Timor-Leste — Prokuradór Jerál Repúblika (PJR), José da Costa Ximenes, Segunda (06/11/2017), hasoru malu ho Prezidente Repúblika, Francisco Guterres Lú-Olo, hodi informa rezultadu reuniaun entre Prokuradór Jerál Repúblika CPLP nian ne’ebé hala’o tiha ona hosi loron 25 to’o 27 Outubru 2017. PJR mós informa kona-ba situasaun kriminalidade iha territóriu Timor-Leste.
Fulan-fulan PJR sempre hato’o informasaun mensál relasiona ho situasaun kriminalidade iha Timor-Leste ba Prezidente Repúblika.
“Ami-nia enkontru ohin ne’e hanesan enkontru mensál nian ne’ebé Prokuradór Jerál sempre hala’o ho Prezidente, no iha-ne’e ami informa kona-ba eventu boot ne’ebé ami foin ultrapasa: Enkontru XV Prokurador Jerál CPLP nian ho situasaun kriminalidade balun”, hatete PJR hafoin hasoru malu ho PR.
Iha okaziaun ne’e mos, PJR informa katak “Durante fulan Outubruru nia laran, Ministériu Públiku (MP) iha eventu boot ne’ebé hanesan sai uma-na’in ba reuniaun dala 15 entre PJR-CPLP, maibé servisu sira seluk relasiona ho prosesu sira la’o normál hanesan baibain.
Aleinde ida-ne’e, PJR mós informa uitoan kona-ba situasaun kriminalidade iha rai laran relasiona ho prosesu kapturasaun eis prizioneiru Juga Gama.
“Hahú tinan ida resin PJR sempre halo kontaktu ho Komandu Jerál PNTL nian hodi buka tuir movimentasaun prizoneiru Juga Gama, hosi Atambua to’o Kupang no hosi Bali to’o Ambon, nune’e semana kotuk liuhosi kooperasaun PNTL ho POLRI Indonézia konsege kaer ona eis prizoneiru ne’e no POLRI Indonézia entrega hikas mai PNTL hodi kontinua nia pena prizaun iha Bekora”, informa PJR.
Tuir PJR katak Juga Gama hanesan atór ba tranzasaun droga. Maske nia halai sai hosi prizaun ninian pena sei suspende hela.
“Durante nia halai sai hosi prizaun ninian pena sei suspende hela, nune’e depois kaer nia no hatama fali ita sei kontinua konta fila-fali nia pena prizaun”, PJR esplika. (Media PJR/Mariano da Conceição)