DÍLI – Prokuradór Jerál Repúblika (PGR) José da Costa Ximenes iha Kuarta (04/10/2017) foin lailais ne’e hasoru malu ho Prezidente Repúblika Lú-Olo hodi informa servisu Ministériu Públiku nian to’o ohin-loron, inklui prosesu investigasaun ba kazu tubaraun ne’ebé envolve kompañia Hong Long hosi Xina

“Enkontru ne’e hanesan enkontru mensál ne’ebé baibain halo ho Prezidente Repúblika hodi informa servisu Ministériu Públiku ninian no atividade sira ne’ebé dezenvolve iha Prokuradoria Jerál Repúblika nian,” dehan PJR.

Kona-ba kazu tubaraun nian, PJR informa katak prosesu investigasaun ba kazu ne’e la’o daudaun hela hodi envolve mós Servisu Investigasaun Kriminál Nasionál (SIKN) PNTL nian.

Tuir PJR, prokuradoria mak inisia prosesu buska no prensaun ba ró ho totál hamutuk 15 ne’ebé agora detein hela iha Portu Díli hodi submete ba prosesu investigasaun tuirmai.  Gabinete Kombate Korrupsaun no Kriminalidade Organizada hosi PJR nian, hamutuk ho prokuradór balu hosi Prokuradoria Distritál Baukau, mak enkarregadu atu halo investigasaun kle’an liután ba kazu ne’e.

Ró hirak ne’e parte PNTL detein iha área Baukau nian iha fulan Setembru 2017 no investigasaun inisiál ba kazu ne’e hahú hosi Prokuradoria Distritál Baukau.

PJR haktuir tan katak PR fó apoiu tomak ba PJR hodi ezerse kompeténsia oioin ne’ebé Ministériu Públiku hetan relativamente prosesu investigasaun saida de’it hodi kumpri nafatin prinsípiu legalidade ne’ebé aplikavel iha Timor-Leste.

PJR informa mós ba PR kona-ba funsionamentu servisu Ministériu Públiku nian hanesan fó pose ba Inspetora ida ne’ebé destaka iha Ministériu Públiku no Prokuradór na’in rua iha Prokuradoria Distritál Díli no Baukau.

PJR mós haktuir tan katak Ministériu Públiku mós envolve iha kazu aprensaun ba mina ilegál iha Maliana no ezekuta ona pena prizaun ba argidu rua kona-ba partisipasaun ekonómika iha kazu Estrada Maliana nian.  Agora argidu na’in rua ne’e kumpri hela pena iha Prizaun Gleno no Prizaun Bekora, respetivamente.

Aleinde ida-ne’e, PJR mós informa ba PR atividade oioin ne’ebé nia envolve foin lailalis ne’e hanesan partisipa iha enkontru anuál kona-ba Asosiasaun Prokuradór nian iha Beijing, Xina no enkontru anuál dahaak kona-ba Asset Recovery Interagency Asia Pacific (ARINAP) nian iha Tókiu, Japaun. Iha enkontru ARINAP nian ne’e, PJR mós hetan oportunidade hodi ko’alia kona-ba Sistema Nasionál Rekuperasaun Ativus Timor-Leste nian.  (Média PJR/Maria Lin)