DILI – Prokuradór-Jerál Repúblika (PJR), José da Costa Ximenes, tersa-feira (04/07/2017) foin lalais ne’e hala’o enkontru regular ho Prezidente Repúblika, Francisco Guterres Lú-Olo, hodi hato’o informasaun kona-ba servisu Ministériu Públiku fulan juñu nian.
Iha enkontru ne’e, PJR informa situasaun kriminalidade iha territóriu Timor-Leste nomos koalia kona-ba preparasaun ba enkontru Prokuradór-Jerál sira hosi Komunidade País sira Lian Portugés nian (CPLP), ne’ebé tuir planu sei realiza iha loron 25 to’o 27, fulan-outubru, iha Dili.
“Ita hetan onra boot ida atu sai hanesan uma na’in ba XV Enkontru ba Prokuradór-Jerál sira CPLP nian, ida ne’e hanesan priviléjiu bo’ot ida ba Timor-Leste tanba ba dala uluk ita mak organiza enkontru refere, nune’e aproveita ho oportunidade ida ne’e hodi konvida ita nia Prezidente Repúblika para bele halo abertura ba enkontru ne’e”, dehan Prokuradór-Jerál Repúblika, ne’ebé mós nu’udar aktual Prezidente ba Enkontru ba Prokuradór-Jerál sira CPLP nian.
PJR hato’o tan katak opsaun tema sentrál ne’ebé propoin ba XV Enkontru ne’e mak ‘Ministériu Públiku iha Globalizasaun’, ne’ebé iha ligasaun ho asuntu sira kona-ba kriminalidade organizada, korrupsaun, tráfiku droga no seluk tan, ka ‘Ministériu Públiku iha Konstrusaun Estadu-de-Direitu Demokrátiku’, tema rua ne’e haruka ba PJR sira hosi nasaun CPLP, tuir estatutu ne’ebé iha, hodi deside hamutuk tema ida ne’ebé mak atu bele foti.
Iha okaziaun ne’e, PJR informa mós kona-ba kazu prizioneiru balun hosi Indonézia no komete krime tráfiku droga halai hosi komarka iha Bali to’o tama iha territóriu Timor-Leste nian, iha fulan-juñu nia laran.
“Foin lalais ita kaer tan sidadaun na’in rua, ida husi nasaun Bulgária no ida husi nasaun India, ne’ebé mak tama iha Timor-Leste ilegál, agora daudaun ita prosesu tuir lei seguransa foun n.° 11/2017 nian hodi haruka fila fali ba Indonézia hodi sira kontinua kumpre pena prizaun iha ne’ebá”.
Entretantu PJR informa ba PR kona-ba ezisténsia MP iha munisípiu sira nune’e mós planu ba tinan-2018 atu estabelese tan delegasaun balun iha munisípiu sira balun hanesan Manufahi ho Lospalos, tanba ne’e PJR husu ba PR atu fó apoiu hodi bele koalia ho Governu atu bele destaka orsamentu ba konstrusaun sira ne’e iha tinan-2018 nia laran.
Nune’e mós PJR informa planu balun tan kona-ba servisu Konsellu Superiór Ministériu Públiku nian, ne’ebé aprova ona iha loron-30 semana kotuk foin lalais ne’e atu bele nomeia Timoroan na’in rua ba kaer servisu inspeksaun Ministériu Públiku nian. (Media PJR)