DILI – Prokuradór-Jerál Repúblika (PJR), José da Costa Ximenes, iha loron-28, fulan-abril, simu posse hosi Prezidente Repúblika, Taur Matan Ruak, hodi kontinua assume mandatu daruak nian ba períodu tinan-2017 to’o tinan-2021.
Hafoin presta juramentu formál, iha ninia diskursu PJR hato’o agradesimentu ba Prezidente Repúblika tanba konfiansa ne’ebé depozita ba nia hodi ezerse nafatin knaar importante no onrozu ida ne’e ba mandatu ida tan.
“Iha juramentu solene ne’ebé ha’u foin presta, atu renova hikas kompromisu ne’ebé ha’u assume ona besik tinan 17, hodi kumpre nafatin Konstituisaun no Lei sira, ha’u hakarak renova kompromisu ho ema hotu no timoroan ida-idak, buka halo buat hothotu atu servisu Ministériu Públiku nian bele kontinua merese duni kualifikativu hosi servisu públiku ne’ebé atribui ba, liliu, bazeia ba legalidade ne’ebé rigorozu no justisa ida ne’ebé independente, kualifikada no hanesan ba ema hothotu”, tenik PJR.
Durante serimónia posse ida ne’e, ne’ebé realiza iha Palásiu Prezidensiál Nicolau Lobato, PJR koalia kona-ba dezafiu sira setór Justisa no trajetória MP iha tinan-16 nia laran, no agradese ba ema hotu ne’ebé fó sira nia kontribuisaun atu instituisaun ne’e bele to’o faze dezenvolvimentu atuál, no nota tan katak órgaun sira setór Justisa nian tenke buka nafatin efisiénsia no kualidade hosi ninia servisu hodi kontribui ba sidadania no dezenvolvimentu sosiál Timor-Leste nian.
“Ho apoiu hothotu nian no dedikasaun majistradu, ofisiál justisa no funsionáriu sira Ministériu Públiku nian, ita konsege ultrapassa dezafiu sira ne’ebé mosu, no ohin ita bele alkansa nível ida ne’ebé importante entre instituisaun sira Estadu nian”, dehan PJR.
José da Costa Ximenes mós hato’o katak hodi hametin susesu sira ne’ebé atinje ona no hasoru dezafiu prezente no futuru sira, presiza servisu makaas nafatin. Ho nune’e, aleinde esforsu hodi mantein númeru pendénsia estável tuir rezultadu ne’ebé atinje iha mandatu dahuluk, nia sei tau ba planu prioridade 2017-2021 kestaun haat tan mak hanesan: primeiru, promove asesu ba justisa ba sidadaun hothotu, liu hosi alargamentu prezensa Ministériu Públiku ba munisípiu sira ho tan divulgasaun no fahe informasaun jurídika ba sidadaun sira; daruak, Ministériu Públiku sei assume mós papel ne’ebé efetivu liu iha defeza no promosaun ba direitu hosi vítima sira, liu-liu sira ne’ebe vitima hosi krime sira violentu no krime bazeia ba jéneru; ba prioridade datoluk, aumenta atuasaun MP nian hodi defende direitu ne’ebé hanaran difuzu no kolektivu sira ne’ebé mak konsubstánsia valór kontituisionál sira ne’ebé importante; aleinde reforsa MP nia papél iha área ezekusaun ba pena.
Iha fatin hanesan Prezidente Repúblika, Taur Matan Ruak, dehan katak José da Costa Ximenes hatudu ona nia kapasidade hodi bele kontinua hala’o knaar hanesan Prokuradór-Jerál Repúblika.
“Dr. José da Costa Ximenes dezempeña ninia kargu ho brillante tebes, kaer metin dezempeñu kompeténsia Konstitusionál sira ne’ebé atribui ba nia ho izensaun no imparsialidade, no sai hanesan lideransa ida ne’ebé hakmatek iha Ministériu Públiku”.
Iha okaziaun hanesan, Prezidente Repúblika mós fó tomada de posse ba Prezidente Tribunál Rekursu foun. Partisipa iha serimónia ida ne’e Ministru Kordenadór ba Asuntu Administrasaun Estatál no Justisa no Ministru Administrasaun Estatál, Dionísio Babo, Ministru Justisa, Ivo Valente, Defensór Públiku Jerál, Sergio Hornai, Xefe Estadu Maior F-FDTL, Majór Jeneral Lere Anan Timur, Komandante Jerál PNTL, Komisáriu Júlio Hornai, ho tan Embaixadór sira iha Timor Leste, aleinde majistradu sira Ministériu Públiku no Tribunál nian. (Média PJR)