Díli – Prokuradór Jerál Repúblika (PJR), José da Costa Ximenes, ofisiálmente lansa website foun Ministériu Públiku (MP) nian iha Prokuradoria Jerál Repúblika iha Kolmera Díli Kinta (21/09/2017) ho hanoin atu fó-sai no atualiza informasaun oioin kona-ba atividade Ministériu Públiku nian ba públiku hodi garante transparénsia no responsabilizasaun.
“Bá-oin buka atu bele atualiza website Ministériu Públiku (MP) foun ne’e, liuhosi informasaun sira ne’e hatudu katak ita garante transparénsia no akontabilidade iha Ministériu Públiku (MP)”, PJR dehan.
PJR mós haktuir tan katak websítiu ne’e lansa atu dokumenta rezultadu oioin ne’ebé Ministériu Públiku alkansa ona, hodi subliña katak website ne’e la bele funsiona hanesan album ida hosi Prokuradór Jerál nian.
“Ha’u lakohi website ne’e sai fali album Prokuradór Jerál nian, hodi foka liu de’it ba Prokuadór nia personalide no institusionaliza servisu Prokuradór Jeral nian de’it” PJR hatete.
Tuir PJR, média iha papél importante atu fahe informasaun ba komunidade, inklui informasaun hodi prokuradoria distritál sira iha Timor-Leste no husu atu servisu média nian kobre mós servisu oioin ne’ebé prokuradoria distritál nian hala’o hodi nune’e iha ekilíbriu entre nasionál no munisipál.
“Média nia papél importante nafatin atu fahe informasaun ne’ebé mak di’ak ba ita-nia komunidade.”
PJR mós husu atu ofisiál prokuradór distritál nian bele serbisu hamutuk ho parte média nian hodi utiliza didi’ak espasu ne’ebé prepara hodi divulga informasaun oioin ne’ebé iha liuhosi website ne’e no Revista Ministériu Públiku nian.
Tuir PJR, lansamentu website ne’e importante hodi fó espasu barak liután ba servisu Ministériu Públiku nian.
Ministériu Públiku iha website tuan ne’ebé fornese informasaun kona-ba kuadru pesoál Ministériu Públiku nian no dadus báziku balu ne’ebé ajente MP sira uza hodi ajuda sira-nia servisu.
Partisipa mós iha eventu lansamentu ne’e mak Diretór Ezekutivu Sentru Estudu ba Pás no Dezenvolvimentu (CEPAD), João Boavida, Inspetora Ministériu Públiku, Angelina Saldanha, Prokuradora Distritál Baukau, prokuradór Repúblika balun, Xefe Gabinete, Diretora Jerál, Diretór Nasionál sira, xefi departamentu no funsionáriu sira ne’ebé haknaar an iha Prokuradória Jerál Repúblika nian, (Média PJR/Luis Soares).