Beijing – Prokuradór-Jerál Repúblika (PJR), José da Costa Ximenes, hola parte iha Konferénsia Anuál XXII no Enkontru Jerál hosi Asosiasaun Internasionál Prokuradór sira ne’ebé hala’o hosi 10 to’o 15 Setembru 2017 iha Beijing, Xina.
Konferénsia Anuál no Enkontru Jerál ne’e realiza tan kooperasaun hosi Asosiasaun Internasionál hosi Prokuradór sira hamutuk ho Ministériu Públiku Supremu hosi Repúblika Populár Xina.
Tema hosi konferénsia ne’e mak Ministériu Públiku iha Interese Públiku: Enfrenta dezafiu no oportunidade oioin iha sosiedade sira ne’ebé iha mudansa (Prosecution in the Public Interest: Facing the challenges and opportunities in changing societies). Tuir komunikadu, tema ne’e aborda konseitu ida katak prokuradór sira sempre serví interese públiku no servisu oioin ne’ebé sira halo orienta ba interese públiku nian, ne’ebé reflete liuhosi definisaun prioridade no organizasaun atividade oioin Ministériu Públiku nian. Konferénsia ne’e mós fó énfaze ba sub-tema ka fenómena globál tolu ne’ebé liga maka’as ho dezempeñu ministériu públiku nian ohin-loron: dijitalizasaun, kooperasaun jurídika, no kreximentu populasionál iha área urbana ne’ebé hetook aas. Konferénsia loron lima ne’e posibilita mós partisipante sira hodi atende semináriu no sesaun paralelu oioin ne’ebé aprezenta tópiku oioin ne’ebé pertinente ho servisu ministériu públiku nian, hanesan siberkriminalidade, anti-korrupsaun, brankeamentu kapitál no rekuperasaun ativus, kontra-terrorizmu no estremizmu violentu, violénsia seksuál relasiona ho konflitu, tráfiku umanu no kontrabandu ba migrante sira, prokuradoria militár no krime ambientál. Iha sesaun abertura nian, Prokuradór Jerál Repúblika Populár Xina, Cao Jianming, haktuir katak objetivu prinsipál hosi konferénsia ne’e mak atu envolve komunidade globál prokuradór sira nian iha diskusaun kona-ba oinsá atu halo servisu ministériu públiku nian kontribui pozitivamente ba dezenvolvimentu no sustentabilidade hosi sosiedade hirak ne’ebé seguru, próspera no justa.
Tuir Prezidente IAP, Gerhard Jarosch, Asosiasaun ne’e organiza enkontru no konferénsia ne’e hodi halibur prokuradór sira atu fahe esperiénsia ba malu kona-ba dezenvolvimentu foun oioin ne’ebé akontese, inklui dezafiu sira, no estabelese kooperasaun oioin ne’ebé nesesáriu atu presta servisu ministériu públiku ne’ebé efikás no efisiente iha sosiedade ohin-loron nian.
Timor-Leste sai membru ba Asosisasaun Internasionál Prokuradór sira (International Association of Prosecutors – IAP) atu hetan benefísiu oioin hosi organizasaun ne’e, inklui kooperasaun sira ne’ebé posível ho hanoin atu kontinua hametin instituisaun Ministériu Públiku nian liuhosi kooperasaun internasionál no kapasita majistradu sira atubele presta servisu ne’ebé efisiente no ho kualidade aas hodi kombate krime.
IAP mak organizasaun globál únika hosi prokuradór sira ne’ebé harii iha 1995 atu lida ho kestaun krime tranznasionál oioin ne’ebé mosu iha mundu hanesan tráfiku droga, brankeamentu kapitál no fraude. IAP nia sekretariadu mak iha Aia, Olanda. To’o ohin-loron, país membru ba organizasaun ne’e ninian membru hamutuk 171 ne’ebé mai hosi kontinente oioin iha mundu.
Tuir planu, Konferénsia Anuál IAP dala-23 sei hala’o iha Durban, Áfrika Súl hosi 9-13 Setembru 2018, ho tema jerál Independénsia Ministériu Públiku: Fatuk-inan Justisa nian ba Sosiedade (Prosecutorial Independence – the Cornerstone of Justice to Society).
Atu hetan liután informasaun kona-ba IAP, no konferénsia ne’e, halo-favór asesa http://www.iap-association.org/. Informasaun seluk tan kona-ba Prokuradoria Populár Suprema hosi Repúblika Populár Xina ne’ebé sai uma-na’in ba Konferénsia ne’e bele asesa iha http://www.iapchina2017.com. (Média PJR)