Díli – Prokuradór Jerál Repúblika hosi Estadu Membru Komunidade hosi País sira ho lian ofisiál Portugés (CPLP) halo vizita kortezia ida ba Prezidente Repúblika Francisco Guterres Lú-Olo iha Kuarta lorokraik (25/10) iha Palásiu Prezidente, Aitarak Laran.

Delegasaun PJR, ne’ebé lidera hosi Prezidente PJR CPLP 2017, Dr. José da Costa Ximenes (Timor-Leste), ne’e kompostu hosi João Maria Moreira de Sousa (Angola), Oscar Silva Tavares (Kabu Verde), António Sedja Mam (Giné Bisau), Beatriz Buchili (Mosambike), Joana Marques Vidal (Portugál), Frederique Samba Viegas d’Abreu (Saun Tomé no Prínsipe), no Ip Son Sang (Rejiaun Administrativa Espesiál Makau).

PJR Brazíl (Grace Maria Mendonça) no PJR Giné Ekuatoriál (José Olo Obono) la marka sira-nia prezensa iha Enkontru Jerál ne’e.  Enkuantu,

Depoizde enkontru ho Prezidente, xefe delegasaun Dr. José da Costa Ximenes haktuir katak vizita kortezia ne’e hanesan oportunidade ida ba prokuradór sira hodi kumprimenta Prezidente Repúblika no apoiu ba Enkontru Jerál Anuál XV Prokuradór Jerál CPLP nian ne’ebé realiza iha Díli hosi 25 to’o 27 Outubru 2017.

 “Ho vizita kortezia ida-ne’e atu mai komprimenta Prezidente Repúblika liliu ba disponibilidade, tempu no hodi simu Prokuradór Jerál Repúblika hosi país irmaun sira,” PJR dehan.

Tanba razaun interna, PJR Brazíl (Grace Maria Mendonça) no PJR Giné Ekuatoriál (José Olo Obono) la marka sira-nia prezensa iha Enkontru Jerál ne’e.

Prezidente Lú-Olo, iha ninian intervensaun felisita Ministériu Públiku Timor-Leste ne’ebé organiza XV Enkontru Jerál Prokuradór Jerál Repúblika CPLP nian no hato’o ninian votu susesu ba enkontru ne’e.

Prezidente Repúblika mós hato’o apresiasaun ba prezensa hosi PJR CPLP nian iha Timor-Leste nu’udar tada apoiu ba dezenvolvimentu sistema judisiária iha país ida-ne’e.

Depois Timor-Leste restaura ninian independénsia iha Maiu 2002, Ministériu Públiku Timor-Leste hola parte iha fórum rejionál no internasionál, espesialmente iha domíniu CPLP nian, hodi estabelese kooperasaun jurídika ho hanoin atu eleva serbisu Ministériu Públiku nian hodi administra justisa.

Enkontru Jerál XIV hosi Prokuradór Jerál Repúblika CPLP nian iha Lizboa Portugál hili Dr. José da Costa Ximenes nu’udar Prezidente ba fórum ne’e iha 2017 hodi hodi promove kooperasaun inter-institusionál judisiária nian.  Enkontru Jerál XV hosi PJR CPLP nian ne’ebé hala’o iha Salaun Nobre Ministériu Negósiu Estranjeiru no Kooperasaun hosi 25-27 Outubru 2017 tada altividade kulminante hosi kooperasaun no relasaun institusionál ba tinan 2017.

Tema jerál hosi enkontru jerál XV ne’e mak Ministériu Públiku no dezafiu oioin Globalizasaun nian. Tema ne’e sei fahe tan ba sub-tema sira seluk hanesan investigasaun kriminál, deskonsentrasaun kompeténsia no diresaun inkéritu, desterritorializasaun atividade kriminoza oioin no problema efetividade kooperasaun internasionál investigatória nian, estrutura organizativa hosi Enkontru PJR CPLP, instrumentu no mekanizmu kooperasaun jurídiku no judisiária no iha espasu CPLP, tráfiku droga nian iha espasu CPLP.

Tuir ajenda, Enkontru Jerál XV ne’e mós sei hasai Deklarasaun Díli nian ne’ebé fó importánsia ba autonomia Ministériu Públiku nian hodi halo ninian knaar sira, no destaka mós kooperasaun rejionál no internasionál hodi kombate kriminalidade.

(Média PJR/Luis Soares).