Lisboa ̶ Prokuradór-Jerál Repúblika Dr. José da Costa Ximenes partisipa Konferénsia Internasionál kona-ba “Kombate hasoru Korrupsaun, Perspetiva ba Futuru” ne’ebé hala’o iha Auditóriu Torre do Tombo, Lisboa, iha loron Kuarta (20/09/2018) foin lalais ne’e.
Iha konferénsia ne’e ko’alia kona-ba dezafiu sira ne’ebé iha relasaun ho kombate kriminalidade Ekonomika no finanseira, debate ne’e hetan partisipasaun hosi espesialista nasionál no internasionál sira mak hanesan; Profesór hosi Universidade Yale nian, jurista hosi OCDE, majistradu no katedratiku Brazileiru.
Aléinde hetan partisipasaun hosi espesialista nasionál no internasionál sira, debate ida-ne’e hetan mós partisipasaun hosi Prokuradór-Jerál sira hosi nasaun CPLP nian, Prezidente Tribunál Justisa Portugal, Prezidente Tribunál Kontas no Bastonáriu hosi Orden Advogadu nian.
Konferénsia ida-ne’e hanesan balansu ba projetu ETHOS nian ne’ebé foka liu ba formasaun intensivu no espesializadu tebtebes iha área prevensaun no investigasaun kriminalidade ekonómiku no finanseiru no korrupsaun.
Konferénsia ne’e loke hosi Ministra Justisa Portugal no taka hosi Prezidente Repúblika Portugal nian. (Media/PJR)