DÍLI – Prokuradór Repúblika Rogério Viegas Vicente hatete ba universitáriu sira durante semináriu ida iha Salaun Auditorum UNTL Díli iha Kuarta (18/10/2017) katak sira iha papél importante hodi sai nu’udar matan, tilun no ain iha prosesu luta kontra korrupsaun.
“Papel estudante importante teb-tebes hanesan ajente transformasaun ita boot sira hatudu bebeik ona kona-ba ita boot sira nia funsan ita boot sira nia papel atu lori transformasaun ne’ebé ho prosperu,” dehan Rogério
“Nu’udar estudante ita-boot sira iha knaar importante oinsá atu kontribui ba prevensaun no kombate korrupsaun iha sosiadade tanba estudante sai hanesan matan, tilun, ain ba ita-nia komunidade … iha área rurál atu nune’e hamutuk deskobre kazu korrupsaun …,” dehan Rogério.
Tuir Prokuradór Rogério, investigasaun ba kazu korrupsaun iha rai-laran sai susar la-halimar no tanba ne’e estudante sira presiza kolabora ho entidade sira seluk hodi preve korrupsaun iha Timor-Leste.
“Prevensaun no kombate korrupsaun ne’e hanesan sai fatór ida importante iha ita-nia rai hodi nune’e bele lori prosesu dezenvolvimentu iha ita-nia rai no ita-nia povu,” tenik Rogério
Prokuradór ne’e rekoñese katak luta kontra korrupsaun la’os kestaun ida fásil maibé mós la’os kestaun ida imposível bainhira iha kooperasaun entre entidade oioin sosiedade nian.
“Ema dehan difísil tebtebes atu halakon korrupsaun iha ita nia rai maibé ho espetativa ne’ebé iha ho servisu kolaborasaun hamutuk, maski susar ita tenki halo buat ruma hodi redús no kombate korrupsaun,” dehan Rogério
Semináriu ho tema Hakbiit Koñesementu Públiku ba Asaun Hasoru Korrupsaun ne’e organiza hosi CEPAD (Centro Estudo da Paz e de Desenvolvimento) no hetan partisipasaun hosi reprezentante universidade sira iha Díli, hanesan UNTL, UNDIL, UNPAZ, DIT no IOB, inklui korpo dosente sira universidade hirak ne’e.
Iha époka ohin-loron nian, mosu krime oioin, inklui korrupsaun, iha sosiedade no tan ne’e presiza kolaborasaun hosi parte oioin hodi kombate.
Foin lalais ne’e Ministériu Públiku, ne’ebé reprezenta hosi Prokuradór Jerál Repúblika, halo nota entendementu ida ho CEPAD hodi halo divulgasaun informasaun ba públiku kona-ba prevensaun korrupsaun. (Média PJR/Luis Soares)