Tibar, Likisá – Prokuradoria Jerál Repúblika liu hosi Konsellu Superior Ministériu Públiku (KSMP) hala’o retiru ba servisu durante tinan 2017, ne’ebé prezide hosi Prokurador Jerál Repúblika, José da Costa Ximenes, retiru ne’e hala’o iha Tibar, Likisá, iha loron Sexta (19/01/18) foin lailais ne’e.
Retiru ne’e hahú ho le’e sai ajenda depois le’e sai mos akta anterior nian no aprezenta relatoriu hodi haree fila fali servisu Konsellu Superior Ministériu Públiku nian (KSMP) durante tinan 2017.
Retiru anual Konsellu Superior Ministériu Públiku ba dala rua ne’e prezide hosi José da Costa Ximenes ne’ebé hanesan Prezidente Konsellu Superior Ministériu Públiku (KSMP), no marka prezensa hosi vogal sira hanesan; Nelson de Carvalho, membru ne’ebé hili hosi majistradus sira Ministériu Públiku, Tiago Amaral Sarmento, hili hosi Prezidente Repúblika, Maria Fátima Correia membru diziknadu hosi Prezidente Repúblika, Rui Pereira dos Santos membru ne’ebé hili hosi governu, no José Augusto Fernandes Teixeira, membru ne’ebé hili hosi Parlamentu Nasional.
Alende ne’e aprezentasaun relatoriu hosi Inspetora Angelina Joanina Saldanha katak relatóriu ne’e kobre ba aktividade Kosellu Superior Ministériu Públiku halo iha tinan 2017 tuir kompetensia hosi art. 17° no.1 estatutu Ministériu Públiku nian bazeia ba baze-legal konstituisaun art.134 nian.
Konsellu Superior Ministériu Públiku hanesan orgaun superior ne’ebé halo jestaun no disiplina ba majistradus sira Ministériu Públiku nian iha kompetensia funsiona servisu inspesaun bazeia ba regulamentu internu PJR nian ne’ebé aprova iha deliberasaun no.5/d/CSMP/1/2008 iha loron 30 fulan-Maiu, tinan 2008, nomós iha regulamentu inspesaun nian ne’ebé aprova ho deliberasaun no.8/d/CSMP/1/2008 iha loron 30 fulan-Maiu, tinan 2008. Hatete Inspetora.
Konsellu Superior hanesan orgaun kolizíal iha Prokuradoria Jerál Repúblika ne’ebé prezide hosi prokurador Jerál Repúblika ne’ebé iha kompetensia ba jestaun disiplinar ba majistradus no ba funsionárius iha âmbitu Ministériu Públiku tuir baze legal.
Funsionamentu servisu inspesaun nian lao bazeia ba Konsellu Superior Ministériu Públiku nian nomós nesesidade sira ne’ebé mosu dezafiu ba Ministériu Públiku no ikus mai hasa’e proposta ba Ministériu Justisa ba medidas sira ne’ebé bele, atu husu intervensaun hosi governu nian, nomós atu hatene liu tan servisu dezenvolve hosi majistradus sira nian.
Iha fatin hanesan PJR mós fó apresiasaun kona-ba relatóriu KSMP nian ne’e hein katak relatóriu tinan oin sei kompleta diak liu tan wainhira relata hotu ho deliberasaun, prosesu disiplinar sira, hodi sai ekilíbriu ida, hodi bele hatene desizaun Konsellu Superior Ministériu Públiku nian, no servisu kada majistradus sira nian durante ne’e, hodi sai baze fundamentu ba Konsellu Superior Ministériu Públiku no transparente ba hotu-hotu. Hatete PJR.
Alende ne’e kona-ba kestaun rekrutamentu formandus sira ne’ebé tuir formasaun, tan ne’e presiza formadores mai hosi Prokuradores sira mós. Kona-ba formandus sira hanesan, presiza determina uluk, molok tuir formasaun. Presiza mós formasaun kontinuasaun hanesan obrigatóriu ba-iha promosaun karreira nomós melloramentu ba kapasidade. Presiza reforsa pedagójika iha sentru formasaun júridiku. (Média PJR/Maria Lin)