DILI, MJ ̶ Adjunta Prokuradór-Jerál Repúblika (APJR) Dra. Zélia Trindade partisipa reuniaun Konsellu Koordenadór Jerál Sentru Formasaun Jurídiku no Judisiáriu (SFJJ), ne’ebé hala’o iha Gabinete Ministru Justisa, iha loron Segunda-feira (10/09/18).
Objetivu reuniaun ida-ne’e atu ko’alia kona-ba preparasaun planu aktividade iha Sentru Formasaun Jurídiku no Judisiáriu nian ba tinan-2019 ho ajenda mak hanesan tuirmai; Nomeasaun Adjuntu Diretór Sentru Formasaun Jurídiku no Judisiáriu, reforma kurrikulár ba kursu majistradu sira, no reforma kuadru formadór iha SFJJ.
Molok hahú ajenda ida-ne’e, Ministru Justisa Manuel Carceres halo introdusaun uitoan kona-ba ba Dekretu Lei Nu.18/2016 loron-20, fulan-Jullu, ho Diploma Ministeriál Nu. 43/2016 loron-27, fulan-Jullu ne’ebé sei altera iha tempu badak nia laran no sei pasa ba Dekretu Lei ho objetivu atu aumenta Adjuntu Diretór ne’ebé ho nia papél hanesan koordenadór ba formasaun hodi atende rekizitu sira ne’ebé hato’o husi formandu sira, tanba foin lalais ne’e halo ona renovasaun ba Estatutu Sentru Formasaun Jurídiku no Judisiáriu, ne’e duni iha artigu balun fó dalan atu monta Adjuntu Diretór, maibé presiza baze legál.
Iha reuniaun ne’e mós, APJR Dra. Zélia Trindade hato’o katak “ami Ministériu Públiku presiza iha mudansa ba formasaun iha Sentru Formasaun Jurídiku no Judisiáriu tanba iha ona diploma foun ne’ebé nesesáriu katak ema ne’ebé konstitui iha sentru formasaun ne’e tenki mai hosi autór judisiáriu sira hodi halo planu ida ke di’ak ne’ebé fó efeitu ba setór justisa. APJR mós akresenta asuntu rua ne’ebé mak tenke hadi’ak liután mak hanesan; primeiru formasaun komplementar, formasaun ida-ne’e depende ba nesesidade instituisaun ida-idak nian tenke ho prazu periódika atu nune’e bele fó tempu ba formadór iha konhesimentu di’ak liután ba lala’ok servisu atuál formandu sira nian atu nune’e bele iha formasaun kontinuasaun ne’ebé efetivu, segundu mak Sistema rekrutamentu, Sistema ida-ne’e presiza hadia di’ak liutan liuliu ba kritériu rekezitu nian”, tenik APJR.
Prezidente Tribunal Rekursu (PTR), Dr. Deolindo dos Santos mós ko’alia kona-ba planu formasaun iha SFJJ tenke bazeia ba nesesidade kada instituisaun ne’ebé mak hamahan an iha SFJJ mak hanesan; Tribunal, Ministériu Públiku, no Defensór Públiku.
PTR akresenta tan katak Sentru Formasaun Jurídiku no Judisiáriu tenke iha formadór ne’ebé mak permanente no kualidade tanba formadór refere mak sei termina kualidade justisa liuhusi kandidatu majistradu ne’ebé mak sei hala’o servisu hodi servi ba estadu ida-ne’e. (Media/PJR)