Dili-Prokuradór-Jerál Repúblika Dr. José da Costa Ximenes halo enkontru ho Prezidente Repúblika Dr. Fransisco Guterres Lú-Olo, enkontru ne’e hala’o iha Gabinete Prezidente, Nicolau Lobato, Bairupite, iha loron Tersa (7/08/18) foin lalais ne’e.
Iha enkontru ne’e Prokuradór-Jerál Repúblika, José da Costa Ximenes informa ba Prezidenti Repúblika, Francisco Guterres Lu-Ólo kona-ba férias judisiál ne’ebé hahú ona iha loron-01, fulan-agostu, tinan-2018 to’o loron-15, fulan-setembru, tinan-2018. Mezmu iha férias judisiál nia laran maibé servisu turnu ba Prokuradór no ofisial justisa sira funsiona nafatin hodi atende kazu urjenti sira. Durante férias judisiál ne’e, Prokuradór-Jerál Repúblika husu mós ba Prokuradór Distritál sira atu halo jestaun ba objetu krime sira ne’ebé nia prosesu arkiva tiha ona atu nune’e bele organiza no haree ba kestaun sira ne’e.
Prokuradór-Jerál Repúblika, José da Costa Ximenes informa mós ba Prezidenti Repúblika katak iha loron-31, fulan-Jullu, Prokuradór-Jerál Repúblika ho nia estrutura tomak hato’o informasaun anuál tinan-2017 ba Parlamentu Nasionál (PN) hanesan devér ida ne’ebé konsagra ona iha konstituisaun no mós iha lei dehan katak Prokuradór-Jerál anualmente hato’o informasaun ba Parlamentu Nasionál (PN).
Iha oportunidade ida-ne’e mós Prokuradór-Jerál Repúblika hato’o ba Prezidenti Repúblika kona-ba kooperasaun institusionál entre Prokuradoria Jerál Repúblika ho Komisaun Funsaun Públiku ne’ebé selebra liuhosi nota memorandu entendementu ida ne’ebé realiza ona iha loron-01, fulan-agostu, tinan-2018.
“iha nota memorandu intendementu ne’e ko’alia kona-ba kooperasaun institusionál hanesan; Formaliza kooperasaun ho Komisaun Funsaun Públika iha ámbitu krime sira ne’ebé akontese iha Funsaun Públika nia ezersísiu, Krime estrañu sira ne’ebé funsionáriu públiku sira involve nuneé mós kona-ba prosesu sivil sira ne’ebé tama iha kompeténsia Ministériu Públiku nian, nune’e mós MP sei reprezenta Funsaun Públika ba krimi asediu seksuál ka krimi menór,” deklara PJR. (Media PJR)