DILI – Adjunta Prokuradór-Jerál Repúblika (PJR), Zélia Trindade, sai hanesan painelista iha XXI Semináriu kona-ba Papél Sidadaun nian iha Dezenvolvimentu Bem Estár ho sub-tema Pás, Justisa no Toleránsia hodi bele konsolida Independénsia Nasionál, ne’ebé realiza iha Sentru Konvensaun Dili, kinta (09/02/2017).
Iha okaziaun refere, APJR apresia no kongratula ba inisiativa Gabinete Primeira Dama hodi realiza semináriu ne’e tanba sai nu’udar oportunidade di’ak ida atu fahe informasaun no hala’o prevensaun ba krime iha períodu eleisaun Prezidensiál no Parlamentár, ne’ebé sei realiza iha tinan-2017 ne’e.
Durante ninia intervensaun, APJR esplika kona-ba provizaun krime eleitorál sira ne’ebé iha Kódigu Penál, artigu 229 to’o 242, inklui fraude resenseamentu, propaganda eleitorál ilísita, obstrusaun ba liberdade atu hili, perturbasaun ba aktu eleitorál, obstrusaun ba aktu eleitorál nia fiskalizasaun, fraude iha votasaun no iha eskrutíniu. Nia esplika mós katak Ministériu Públiku (MP) atensaun hela, kordena mós ho Komisaun Nasionál ba Eleisaun (akrónimu hosi portugés, CNE), atu responde ba kazu sira ne’ebé hanesan krime eleitorál nian, kuandu karik krime sira ne’e mosu MP sei loke prosesu tuir lei ne’ebé mak iha.
“Ita mós tenke respeita ba parte internasionál, ba direto sivil no polítika no instrumentu internasionál sira seluk no eleminasaun ba raas no direito feto nian hanesan sidadaun. Uainhira mosu iha eleisaun halo ema tensaun aas hodi hamosu ho hahalok ne’ebé la di’ak. Ita hanesan estadu demokrátiku ita mós tenke garante ita nia estabilidade iha ita nia nasaun rasik ho eleisaun ida ne’e forma governu ne’ebé foun ita tenke konsiente no haree tuir ida-idak nia konsiénsia se mak serve hodi ita bele hili ba reprezentante ba rai ida ne’e, atu ita nia festa demokrasia ida ne’ebé bele la’o ho di’ak”, tenik APJR.
Semináriu ne’e hetan abertura hosi Primeiru Ministru, Rui Maria de Araújo, ho mediasaun no enserramentu hosi Ministru Estadu, Kordenadór ba Asuntu Administrasaun Estadu no Justisa no Ministru Administrasaun Estatál, Dionísio Babo Soares; no painelista sira inklui mós, aleinde APJR, Bispo Dioseze Dili, Dom Virgílio do Carmo da Silva; Xefe Estado Maior Jeneral F-FDTL, Major Jeneral Lere Anan Timur; Komandante-Jerál PNTL, Komisariu Júlio Hornay; Prezidente Komisaun Nasionál Eleisaun sira-nian (akrónimu hosi portugés, CNE), Alcino de Araújo Barris; Prezidente Komisaun Funsaun Públika (CFP), Faustino Cardoso Gomes; Diretór Jerál Sekretariadu Tékniku Administrasaun Eleitorál nian (STAE), Acilino Manuel Branco; no Provedór Direitu Umanu no Justisa, Silvério Pinto Baptista. (Media PJR)