Baukau, Timor-Leste – Tribunál Distritál Baukau (TDB) iha 30 Outubru 2017 kondena argidu ho inisiál JCC hodi tama kadeia tinan 20 tanba provadu komete krime abuzu seksuál agravadu ba vítima menór ida, ho inisiál NCX.
Nu’udar haktuir iha leitura akordaun TDB nian, JCC hetan kondenasaun iha primeira instánsia ho pena únika tinan 20 ba kadeia tanba provadu katak nia hanesan autór materiál ho forma konsumada ba krime abuzu seksuál agravadu (dala rua) ba menór, tuir Artigu 177 (nú. 1), 182 (nú. 1 al. 1) hosi Kodígu Penál.
Tuir faktu ne’ebé aprezenta durante prosedimentu, akontesimentu ne’e mosu iha Setembru 2014 iha Lutumutu, Tirilolo, Baukau. Iha 2014, vítima NCX natoon ne’e foin tinan 11.
Julgamentu ne’e hala’o hosi juís koletivu ida ne’ebé prezide hosi Juís Afonso Carmona, ho ninian membru sira kompostu hosi Juís José Gonçales no Juíza Ersilia de Jesus. Reprezenta Ministériu Públiku altura ne’ebá mak Dra. Ivónia Guterres. Argidu hetan asisténsia legál hosi Defensór Públika. (Média PJR)