Dili-Prokuradór-Jerál Repúlika (PJR), Dr. José da Costa Ximenes, iha segunda feira, loron-28, fulan-Janeiru, tinan-2019, hala’o enkontru ho Prezidente Repúblika, Dr. Francisco Guterres Lu-Olo iha Palásiu Prezidente Bairro-Pité, hodi informa planu servisu durante tinan ida nia laran ba PR
Iha enkontru ne’e, Prokuradór-Jerál Repúblika Dr. José da Costa Ximenes informa ba Prezidente Repúblika, Dr. Francisco Guterres Lú-Olo kona-ba atividade Ministériu Públiku nian mak hanesan; rezultadu retiru anuál MP nian ne’ebé hala’o tiha ona iha loron-17 to’o loron-18, fulan-Janeiru, tinan-2019 ne’ebé ramata ho atividade sosiál liuhosi vizita ba Uma Mahon Casa Vida atu haree diretamente vitima sira-nia kondisaun hodi fó apoiu morál espirituál ba sira.
Aléin informa kona-ba rezultadu retiru anuál MP nian, PJR mós Informa kona-ba retiru anuál Konsellu Superiór Ministériu Públiku (KSMP) ne’ebé hala’o tiha ona iha loron-25, fulan-Janeiru, tinan-2019, hanesan temi tuirmai “iha retiru anuál KSMP ami define kona-ba planu KSMP no planu Prokuradoria Jerál Repúblika ba tinan-2019 ne’ebé sei hahú husi primeiru trimestre fulan-Janeiru to’o loron-30, fulan-Marsu, sei hala’o formasaun no preparasaun ba kargu sekretáriu sira iha MP”.
Iha oportunidade ida-ne’e mós PJR salienta tan katak, iha tempu badak nia laran sei halo mós promosaun ba kargu eskrivaun sira, “ita sei halo promosaun ba kargu eskrivaun-de-direitu sira, sira ne’ebé iha adjuntu-eskrivaun-de-direitu promove ba eskrivaun-de-direitu, nune’e mós ofisiál dilijénsia sei promove ba adjuntu eskrivaun, ida ne’e ita sei halo mós iha fulan rua ka tolu tuirmai, iha fulan Maiu no Juñu ita sei halo rekrutamentu ba ofisiál justisa nain sanulu resin-haat, nune’e iha fulan-Setembru, tinan-2019, ofisiál justisa nain sanulu resin haat ne’ebé ita rekruta sei hahú ho prosesu formasaun iha loron-15, fulan-Setembru, tinan-2019, ida ne’e atu suporta Prokuradór foun ne’ebé tama”, Tenik PJR.
Husi parte seluk PJR informa tan katak, “iha fulan-Jullu, tinan-2019 ita sei halo planu inspesaun ordinária ida ba Prokuradór nain haat ne’ebé prenxe ona rekezitu atu promove ba primeira klase no iha fin-de-Outubru, tinan-2019 ita sei hala’o mós promosaun ba Prokuradór nain sanulu ne’ebé kompleta ona tinan tolu, sei hetan promosaun ba segunda klase liuhosi servisu inspeksaun.
Entretantu PJR informa mós ba Prezidente Repúbllika kona-ba formandu nain lima ne’ebé sei sai hanesan Prokuradór estajiáriu iha fulan-Fevereiru tinan-2019 ne’ebé termina tiha ona sira-nia formasaun iha sentru formasaun Jurídiku no faze prátiku iha MP. Hahú hosi loron-01, fulan-Fevereiru, tinan-2019 formandu sira ne’e sai nu’udar prokuradór estajiáriu iha MP hodi bele haforsa tan kuadru prokuradór sira, tanba ida-ne’e mak iha fulan-Maiu ne’e ita sei halo rekrutamentu ba osifisál justisa sira. (Media MP)