DILI – Arguidu Paulo Ximenes Belo hetan kastigu tinan 19 kadeia tanba provadu komete krime abuzu seksuál ba menór, krime koasaun seksuál no krime ofensa ba integridade fízika simples hasoru nia oan feto rasik, ne’ebé iha momentu krime hirak ne’e akontese iha idade tinan 13.
Liu hosi leitura akórdaun hosi Tribunál Distritál Díli (TDD), ne’ebé fó sai iha loron-29, fulan-setembru, tinan-2016, Paulo Ximenes Belo hetan kondenasaun iha primeira instánsia ho pena únika tinan 19 tanba provadu katak nia hanesan autór ba krime abuzu seksuál ba menór tuir artigu 177.°, ho forma agravadu tanba vítima nia oan rasik tuir artigu no 182.° n.° 1 al. d) Kódigu Penál nian, krime koasaun seksuál tuir artigu 171.0 ho forma agravadu tuir artigu 173.° als. a) no d) Kódigu Penál nian, no krime ofensas integridade fízika simples – violénsia doméstika tuir artigu 145.°, n.° 1 Kódigu Penál nian konjugadu ho artigu 2.°, 3.° al. c) no 35.°, al. b) Lei Kontra Violénsia Doméstika nian.
Tuir faktus ne’ebé provadu iha akuzasaun ne’ebé aprezenta hosi Ministériu Públiku katak iha loron-1, fulan-fevereiru, tinan-2014, haleu oras tuku 9:00 kalan, lezada haree hela televizaun iha uma iha Ermera Vila, suku Poetete, no arguidu bolu fali nia atu ba kuartu laran hodi obriga hasai ninia ropa no halo relasaun seksuál ho nia. Hafoin komete tiha krime ne’e, arguidu mós ameasa lezada atu labele fó hatene ba nia inan madrasta inklui família sira kona-ba ninia hahalok.
Iha loron-30, fulan-novembru, tinan-2014, iha oras tuku 8:00 kalan, arguidu aproveita lezada mesak iha uma hodi kontinua halo asaun ne’e hasoru lezada. Tanba la kontente ho hahalok arguidu nian mak lezada informa hahalok refere ba nia tian (arguidu nia feton) hodi informa tutan ba arguidu nia fen maibé sira tauk atu husu tuir arguidu. Tuir mai iha loron-4, fulan-novembru, tinan-2015, arguidu foti kadeira ida baku iha lezada nia ulun, kauza lezada sente moras no hetan lezaun iha ulun maibé bandu nia labele ba buka tratamentu médiku.
Julgamentu ne’e hala’o hosi kolektivu juiz sira, prezide hosi Dr. Ivan José Suritay Patrocínio Antonino ho tan Dra. Edite Palmira dos Reis no Dra. Maria Modesta Vieira. Ministériu Públiku reprezenta hosi Dr. Rogério Viegas Vicente no arguidu hetan asisténsia legal hosi Defensoria Públika. (Média MP)