DILI – Arguidu António de Jesus da Costa simu kastigu pena únika tinan 12 kadeia tanba provadu komete krime violasaun seksuál rua ba ninia prima, tuir artigu 172.°, ho forma agravada tuir artigu 173.° al. a) Kódigu Penál nian. Tribunál Distritál Dili desidi mós katak arguidu tenke selu indenizasaun ba lezada ho montante $700.
Tuir faktu provadu sira ne’ebé aprezenta iha akuzasaun hosi Ministériu Públiku katak arguidu foti kompeténsia hanesan vítima nia aman hodi koalia lia kona-ba uniaun ho nia la’en. Liu tiha fulan ualu, arguidu lori fós saku 3, tais ida no lipa ida hodi intrega iha serimónia hakoi sasin vítima nia la’en nia aman ne’ebé mate. Maibé depois de hakoi tiha mate, lezada nia la’en la fó fila karau ba arguidu hanesan umane no mane foun, tan ne’e arguidu hirus no foti lezada nia roupa husi nia la’en nia uma no haruka lezada atu ba hela iha ninia uma, iha suku Baboe Craick, Sub-distritu Atsabe, Munisípiu Ermera, iha loron-14, fulan-maiu, tinan-2013. Arguidu la husik lezada atu sai mesak, mesmu lezada nia inan no la’en husu ho haraik a’an. Arguidu mós halo agresaun hasoru lezada nia la’en dala rua bainhira nia ba arguidu nia uma hodi tenta konvense arguidu atu bele lori lezada fila ba uma.
Durante tempu lezada hela iha arguidu nia uma, iha kalan ida arguidu ameasa nia ho katana hodi obriga nia halo relasaun seksuál. Liu tiha ida ne’e, iha loron seluk arguidu obriga fali lezada halo relasaun seksuál ho nia iha to’os laran. Hosi hahalok ne’e rezulta lezada isin rua no partus bebe mane ida iha fulan-setembru, tinan-2014, maibé bainhira isin rua arguidu duni sai lezada hosi ninia uma.
Julgamentu ne’e hala’o hosi kolektivu juiz sira, prezide hosi Dra. Ana Paula Fonseca de Jesus ho tan Dra. Jacinta Correia da Costa no Dr. Eusébio Xavier Victor, no leitura akórdaun hala’o iha loron-6, fulan-juñu, tinan-2016. Ministériu Públiku reprezenta hosi Dr. Rogério Viegas Vicente no arguidu hetan asisténsia legal hosi Defensoria Públika. (Média PJR)